थिकेथिकेगु गाडी न्याइपिं डाक्टरत अप्वल !
येँ- देशय् ब्वलंगु कोरोनाया महामारीं सम्पूर्ण ख्यःया कारोवार ठप्प जुयाः सकलें धइथें नेपाःमितय्त आर्थिक संकटं ग्रस्त याःगु खःसां चिकित्सा ख्यलय् सक्रिय अधिकांश डाक्टरतय्त धाःसा थ्व महामारीं आर्थिक रुपं कल्याण हे याःगु खनेदु । उकिया दसि कथं थौंकन्हय् खने दयाच्वंगु दु थीथी गाडी कम्पनीइ अप्वयाच्वंगु गाडीया बिक्री वितरण ।
कोरोना महामारीं यानाः जनताया आर्थिक अवस्था डाँवाडोल जुयाच्वंगु इलय् नं देशय् थिके थिकेगु गाडीया बिक्री धाःसा न्हापा स्वयां अप्वःगु दु । थज्याःगु आर्थिक डाँवाडोलया इलय् नं विलाशी गाडीया बिक्री अप्वःगु खनाः अर्थ विश्लेषकत अजूचायाच्वंगु दु । विज्ञ सूत्रतय्सं धाःकथं थौंकन्हय् देय्या थीथी थासय् थिकथिकेगु गाडी न्याना काइपिं अप्वः धइथें ग्राहकत डाक्टर पेशालिसे आवद्धपिं जुयाच्वंगु दु । येँया छगू शोरुमय् कार्यरत कर्मचारीं ‘नेपालभाषा टाइम्स’ यात कनादी कथं थौंकन्हय् अप्वः धइथें गाडीया अर्डर डाक्टरतय्पाखें वयाच्वंगु दु । उमिसं गाडी अर्डर याइ–बलय् दंगु गाडी स्वयेगु मयाः ।
अधिकांश डाक्टरतय् रुची थौंकन्हय् १ करोड तका वंगु गाडीपाखे वनाच्वंगु खँ नं धाःगु दु । उमिसं गाडी बारे न्यनेकने याइबलय् १ करोड तकाया बजेट दुने लाःगु गाडी छु दु धकाः न्यनेगु यानाच्वंगु खँ नं उम्ह कर्मचारीं कनादीगु दु ।
अथे हे मेगु गाडी विक्रेता कम्पनीया छम्ह अधिकृतं धाःकथं थौंकन्हय् न्हूगु गाडी न्याइपिं डाक्टरतय्सं पुलांगु गाडी मी माल धकाः न्यनेकने याइगु नं अप्वयाच्वंगु दुु । उगु कम्पनीइ नं डाक्टरतय्सं विशेष यानाः थिकेथिकेगु हे गाडी मालेगु यानाच्वंगु दु । डाक्टर पेशा याइपिं गुलिखे ग्राहकतय्सं लिपा मी माल धाःसा उकिया मूल्य मस्यनी कथंया गाडी दुसा जिउ धकाः ‘इन्क्वायरी’ यायेगु नं यानाच्वंगु दु ।
मेखे गाडीया बजाः थहां वनाच्वंगु इलय् ग्राहक सालेगु लागिं हुण्डाइ कम्पनीं छगः गाडी न्यात धाःसा सिरपाः कथं हानं मेगु गाडी हे दइगु कुपन समेत इनाच्वंगु खँ सीदुगु दु । अज्याःगु स्क्राय्च कुपन लात धाःसा ग्राहकं थम्हं छु गाडी न्याःगु खः वहे गाडी सिरपाः काये खनीगु व्यवस्था यानातःगु दु ।
सूत्रं धाःकथं गाडीया बिक्री अप्वयाच्वंगु कारणं ग्राहक सालेगु लागिं बिक्रेतातय्सं थज्याःगु ‘स्किम’ न्ह्यःने हयाच्वंगु खः । कोरोनाया इलय् स्वास्थ्य क्षेत्रं याःगु ‘प्रगति’ या लिच्वः थौंकन्हय् गाडीया बजारय् लानाच्वंगु खँ विज्ञतय्सं धाःगु दु ।
LEAVE YOUR COMMENTS