स्वनिगःया स्कुलय् झाडावान्ताया प्रकोप
येँ- स्वनिगःया थीथी विद्यालयय् विद्यार्थीतय्त झाडावान्ताया समस्या खनेदयेवं उकियात कयाः अध्ययन यायेत प्रभावित विद्यालयय् स्वास्थ्यकर्मी परिचालन याःगु दु । स्वास्थ्य सेवा विभागया महानिर्देशक डा. दिपेन्द्ररमण सिंहं छुं विद्यालयया विद्यार्थीपिंत झाडावान्ताया गुनासो वःगुलिं स्वास्थ्यकर्मी परिचालन जुइधुंकूगु जानकारी बियादीगु दु ।
बुढानिलकण्ठ हात्तिगौंडाय् च्वंगु यूरो स्कुल, मेरिडियन्ट स्कुल बालुवाटार, यूरो किड्स छाउनी, ज्ञानभूमि बुढानिलकण्ठया विद्यालयया मस्तय्त झाडावान्ताया समस्या जुयाच्वंगु खँ नेपाल अभिभावक महासंघं धाःगु दु । महासंघया कथं यूरो विद्यालयया छुं विद्यार्थी अस्पताल भर्ना तकं जुइमाःगु जानकारी बिउगु दु ।
थीथी विद्यालयय् तःधंगु ल्याखय् मस्तय्त झाडावान्ताया समस्या खनेदयेवं संघं थीथी निकायय् जानकारी याकूगु खः । अभिभावक महासंघया अध्यक्ष सुप्रभात भण्डारीं स्वनिगःया न्हय्गू विद्यालयया मस्तय्त झाडावान्ताया समस्या जूगु खँ कनादीगु दु ।
मेखे म्हिगः हे बुढानिलकण्ठ नगरपालिकां नं यूरो स्कुलया अनुगमन याःगु दु । बुढानिलकण्ठ नगरपालिकाया शिक्षा शाखाया विद्यालय निरीक्षक इन्द्रप्रसाद दाहालंया कथं छुं छुं विद्यालयय् समस्या खनेदुगु व छुं विद्यार्थी सामान्य जुइधुंकूगु तर छुं मस्तय्त धाःसा अस्पताल यंकूगु जानकारी बियादीगु दु । वय्कलं विद्यालयं अज्याःगु छुं मलूगु तर फुड प्वाइजन जूगु अनुमान धाःसा यानादीगु दु ।
LEAVE YOUR COMMENTS