थुगुसी छाय् थथे खुसिबाः वःगु ?

येँ – थुगुसी छक्वलं हे थीथी थासय् वा वयाः आपालं धनजनया क्षति जूगु खँयात कयाः मौसमविद्तय्सं विश्लेषण शुरु याःगु दु । उमिसं याःगु विश्लेषण कथं थुगुसी दछियंकं वयेमाःगु वा न्यान्हुं वःगु कारणं यानाः थपाय्च्वः क्षति जूगु खः ।

थुगुसी इलय् हे मनसुन शुरु जूगु खःसा शुरुं हे यक्व वा वयाः थथे क्षति जूगु खँ धाःगु दु । तर थुगुसी धाःसा अजूचायापुक मनाङ जिल्लाय् अप्वः क्षति जूगु दु । थुगुसी मनाङय् क्षति जूगु खँय् नं मौसमविद्त अजूचाःगु दु । विश्लेषक–तय्सं धाः कथं मनाङ उलि यक्व वा वइगु थाय् मखु । थन पूरा दछिया दुने ३९५ मिलिमिटर वा वयेगु याइ । अन अप्वः वा वःगु धइगु हे मनसनु शुरु जुइवं प्यलाया दुने हे २३४ मिलिमिटर तक वा वःगु रेकर्ड दु । तर थुगुसी धाःसा मनसुन शुरु जुइवं निन्हुया दुने हे करिब १०० मिलिमिटर वा वया बिउगु कारणं थपाय्च्वः खुसिबाः वःगु खँ मौसम विज्ञान विभागं धाःगु दु ।
मनाङय् दछिया दुने गुलि वा वइगु खः व स्वयां नं ३० प्रतिशत अप्वः वा मात्र निन्हुया दुने वःगु खः ।

अथे हे थुगुसी सिन्धुपाल्चोकय् वःगु वा नं अजूचायापुगु खँ विज्ञतय्सं धाःगु दु । मेलम्ची लागाय् थुगुसी यक्व वा वयेफु धकाः न्हापा हे नं भविष्यवाणी याःगु खः । अज्याःगु हे भविष्यवाणीया कारणं थुगुसी येँय् मेलम्चीया लः बीगु नं बन्द याःगु खः । यदि लः बियां तुं च्वंगु जूसा लः वइगु सुरुङ तकं क्षति जुइगु खः ।

सम्बन्धित बुखँ

LEAVE YOUR COMMENTS