हथासं वःपिं चिनियाँतय् सक्रियता

विभाजित जूगु नेकपायात फुसा हानं एकता यायेत इनाप

येँ (नेपालभाषा टाइम्स) – संसद विघटन लिपा नेपालय् ब्वलंगु राजनीतिक कचवं बारे सीकेत म्हिगः हथासं वःगु चिनियाँ प्रतिनिधि मण्डलं राष्ट्रपति विद्यादेवी भण्डारींनिसें कयाः प्रधानमन्त्री केपी शर्मा ओली, माधव नेपाल, पुष्पकमल दाहालयात समेत नापलाःगु दु ।

चिनियाँ कम्युनिष्ट पार्टी अन्तर्राष्ट्रिय विभागया उपमन्त्री गुओ येचौया नेतृत्वय् प्यम्हेसिया पुचः म्हिगः नेपाः वःगु खः । नेपालय् संसद विघटन जुइवं थनया वस्तुस्थिति सीकेत वःगु थ्व न्हापांगु विदेशी पुचः खः । चिनियाँ प्रतिनिधि मण्डल कोरोना संक्रमणपाखें बचे जुइत विमान दुने हे पीपीई पुनाः एअरपोर्टय् कुहां वःगु खःसा उपिं वहे वसतय् तुं चिनियाँ राजदूतावासय् दुहां वंगु खः । उमिगु थनया फुक्क हे ज्याझ्वः गोप्य यानातःगु खः । नेपाल सरकारं पुचःयात बी धाःगु सुरक्षा गार्ड समेत उमिसं अस्वीकार यासें थःगु हे हिसाबं वनेगु खँ धाःगु खः ।

उपिं थनया छुं होटलय् मच्वँसे चिनियाँ राजदूतावास दुने हे च्वंगु खः । चिनियाँ पुचलं अनया राष्ट्रपति सी जिनपिनया सन्देश समेत ज्वना वःगु खँ सूत्रं धाःगु दु। विभाजित नेपाल कम्युनिष्ट पार्टीया निगुलिं खेमाया नेतातय्त नापलासें पुचलं सम्भव दुसा पार्टीयात हाकनं एकता यायेगु कुतः याये माली धकाः बः बिउगु खँ सीदुगु दु। यदि तत्काल पार्टी एकता सम्भव मदुसा विवादयात अझ तच्वः मयायेगुपाखे कुतः यायेत नं इनाप याःगु खँ सीदुगु दु ।

चीनं थ्व स्वयां न्ह्यः नेपाःया निंतिं चिनियाँ राजदूत होउ यान्छीयात नेतातय् छेँय् छेँय् छ्वयाः खँ ल्हाके बिउगु खः । तर राजदूतया खँपाखें जक ज्या मजुइ थें च्वंगुलिं अनया उच्चस्तरीय पुचः हे नेपाः वःगु खः । थ्व पुचःया मुख्य अधिकारी जूम्ह मन्त्री चिनियाँ राष्ट्रपति सी जिनपिन नेपाः वःबलय् नापं वःम्ह खः ।

आन्तरिक मामिलाय् हस्तक्षेप : भारत
चिनियाँ पुचः नेपाः वयाः नेपाली नेतातय्त नापलाःगु थ्व ज्यायात भारतीय सञ्चार माध्यमतय्सं ‘नेपाःया आन्तरिक मामिलाय् चिनियाँ हस्तक्षेप’ धाःगु दु । नेपाःया सत्तारुढ दल नेकपायात मिले यायेगु लागिं चीनं भूमिका म्हितूगु जुयाः आः थ्व पार्टी तज्यायेवं उकियात मिले यायेगु लागिं चिनियाँ पुचः नेपाः वःगु खँ भारतया अंग्रेजी न्हिपौ ‘टाइम्स अफ इण्डिया’या अनलाइन संस्करणय् च्वया हःगु दु। चीनं ‘बेल्ट एण्ड रोड’ परियोजना शुरु यायेवं नेपालय् प्रशस्त लगानी याःगु जुयाः नेपालय् आः ब्वलंगु राजनीतिक अस्थिरतां यानाः चीन चिन्तित जूगु खँ नं भारतीय पत्रिकां च्वःगु दु । नेपालय् जुयाच्वंगु थःगु लगानीया सुरक्षाया लागिं चीन सक्रिय जूगु खँ नं उकी च्वयातःगु दु ।