येँ महानगरपाखें विज्ञान प्रविधि प्रतिष्ठान व प्रकृति संरक्षण कोषलिसे सम्झौता

येँ – येँ महानगरपालिकां नेपाल विज्ञान तथा प्रविधि प्रज्ञा प्रतिष्ठान व राष्ट्रिय प्रकृति संरक्षण कोषलिसे बिस्कं बिस्कं सम्झौता याःगु दु । येँ महानगरं शहरी समस्याया वैज्ञानिक व प्रविधियुक्त विधिपाखें समाधान यायेगु ल्याखं प्रतिष्ठान व जैविक विविधता नापं हरियाली प्रवद्र्धन यायेगु ल्याखं कोषलिसे सम्झौता जूगु खः ।

येँ महानगरपालिका प्रमुख विद्यासुन्दर शाक्य व प्रतिष्ठानया उपकुलपति डा. सुनिलबाबु श्रेष्ठं सम्झौता पती ल्हाःचिं तयादीगु खः । सम्झौता पती ल्हाःचिं तयेगु ज्याझ्वः लिपा येँ महानगर प्रमुख शाक्यं आवश्यकताय् आधारित योजनावद्ध विकासया निंतिं प्रतिष्ठानलिसें सहकार्य यानागु जानकारी बियादिल । लिसें वय्कलं थुगु सहकार्यपाखें प्राप्त जुइगु लिच्वःपाखें महानगरवासी लय्ताइगु व सेवाय् सन्तुष्टि प्राप्त जुइगु थम्हं अपेक्षा यानागु खँ कनादिल ।

प्रतिष्ठानया उपकुलपति डा. श्रेष्ठं महानगरलिसे सहकार्य याये खंगुलिं लसता प्वंकाािदसें थुकथंया सहकार्यपाखें जुइगु ज्याझ्वलं मेमेगु स्थानीय निकाययात नं ज्या वइकथंया विधित प्राप्त जुया वनीगु विश्वास प्वंकादिल ।

सम्झौताकथं शहरी वस्तु व सेवाय् खने दुगु समस्याया समाधानया निंतिं विषयया अध्ययन, अनुसन्धान व विकास यायेत प्रतिष्ठानय् शहरी अनुसन्धान व नवप्रवर्तन केन्द्र स्थापना याइगु जूगु दु ।

थुकथं हे येँ महानगरपालिकां राष्ट्रिय प्रकृति संरक्षण कोषलिसे नं सम्झौता याःगु दु । येँ महानगरं कोषलिसे जैविधि विविधता व हरियाली प्रवद्र्धन यायेगु विषयय् छगू सम्झौता याःगु खः । निगू पक्षया दथुइ विशेष यानाः येँ महानगरया सहरी सौन्दर्यता व हरियालीइ वयाच्वंगु ¥हास व जैविक विविधतायात पुनःस्थापना यायेगु ल्याखं उगु सम्झौता जूगु खः ।

येँ महानगरपालिकाया प्रमुख विद्यासुून्दर शाक्य व उपप्रमुख हरिप्रभा खड्गी श्रेष्ठया रोहवरय् महानगरपालिकाया प्रमुख प्रशासकीय अधिकृत राजेश्वर ज्ञवाली व कोषया सदस्य सचिव शरदचन्द्र अधिकारी उगु सम्झौता पती ल्हाःचिं तयादीगु खः ।

उगु सम्झौताया मुख्य उद्देश्य वा ज्या धइगु विशेष यानाः येँ महानगर दुनेया विद्यमान शहरी हरियाली व जैविक विविधताया विद्यमान अवस्थायात सुधार यानाः पुनःस्थापना यायेगु खः । येँ महानगरं निर्माणया ज्या न्ह्याकूगु पार्क, उद्यान, वन, खुसि सिथ व सार्वजनिक थासय् याःगु हरियालीयात व्यवस्थित यायेगु व वैज्ञानिक रुपं उकिया विकास यायेत आवश्यक जुइगु नीति, रणनीति, कार्ययोजना दयेकेगु व उकियात व्यवस्थित यानाः कार्यान्वयनय् हयेगु सम्झौता पती न्ह्यथनातःगु दु ।

ल्हाःचिं तयेगु ज्याझ्वः लिपा येँ महानगर प्रमुख शाक्यं महानगरपाखें थ्व स्वयां न्ह्यः निर्माण जूगु पार्क, उद्यान हरियाली प्रवद्र्धन यायेगु ल्याखं जूगु वृक्षारोपणया प्रवद्र्धनया ज्याय् थुगु सहकार्यं ग्वाहालि जू वनीगु विश्वास प्वंकादिल ।
लिसें वय्कलं विगतया कमी कमजोरीया सुधार यायेत वइगु दिनय् अझ गुकथं व्यवस्थित व वैज्ञानिक याये फइ धइगु खँय् नं सहकार्य प्रभावकारी जुया वनीगु आशा यानादिल ।

कोषया सदस्य सचिव अधिकारीं अप्वया वनाच्वंगु शहरीकरणया कारणं येँ महानगरलिसें स्वनिगः परम्परा व रैथाने जैविक विविधता व हरियाली प्रणालीइ तःधंगु लिच्वः लानाच्वंगु धासें स्यना वनाच्वंगु थुगु अवस्थायात भिंकेगु तःधंगु अवसरया रुपय् थःपिंसं कयागु दु धयादिल ।