मिखाया स्वास्थ्य सर्वेक्षण जुइगु

मिखां मखनीगु स्थिति पत्ता लगे यायेत मिखाया स्वास्थ्य सर्वेक्षण याइगु जुगु दु । नेपाल नेत्रज्योति संघं वइगु २०७५ असारंनिसें मिखाया स्वास्थ्य सर्वेक्षण शुरु यायेत्यंगु खः । संघया अध्यक्ष प्रा. डा. तीर्थप्रसाद मिश्रं सर्वेक्षणय् मिखा मखनीगु स्थिति, उपचार सेवाय् पहुँच, उपचार जुइ मफुगुया कारणं, चिनील्वय्या कारणं मिखाय् जुइगु समस्या लगायतया स्थिति बारे अध्ययन यायेगु जुइ धयादीगु दु ।मिखा सम्बन्धी स्वास्थ्य क्षेत्रय् ज्या यायेतकथं नेपालं मिखा मखनीगु समस्या चिइकेत मिखाया उपचार सेवा अप्वयेकाः जनताय् जनचेतना अभिवृद्धि यायेगु उद्देश्यं थनिं ४० दँ न्ह्यः स्थापना जूगु नेपाल नेत्रज्योति संघं न्हय्गुलिं प्रदेशय् मिखाया स्वास्थ्य स्थितिबारे सर्वेक्षण याइगु जूगु दुसा उकिया आवश्यक तयारी लिपांगु चरणय् थ्यने धुंकूगु जानकारी बिउगु दु ।

आः हे नं ७० प्रतिशत स्वयां अप्वः मिखां मखनीगु समस्याया कारण मोतिविन्दु जूगु सम्बन्धित चिकित्सकय् धापू दु । मिखासमबन्धी जनचेतनाया म्होतिया कारणं इलय् उपचार सेवा काये मखनीगुलिं अप्वःथें मनुखं मिखा मखनीगु ल्वय्या शिकार जुइमाःगु धासें सर्वेक्षणपाखें वःगु तथ्यपाखें प्रभावकारी रणनीति नालाः न्ह्याः वनेत सहज जुइगु संघया धापू दु ।
संघा कार्यकारी निर्देशक शैलेशकुमार मिश्रं सर्वेक्षणया निंतिं छगू प्रदेशय् म्होतिं नं २५ गू लाख खर्च जुइगु अनुमान यानागु जानकारी बियादीगु दु । वय्कलं धयादिल, ‘सर्वेक्षणया निंतिं आवश्यक जनशक्ति कायेगु जुइ, सर्वेक्षणय् छगू करोड स्वयां अप्वः बजेत लगे जुइगु अनुमान दु ।’ थीथी गैरसरकारी संघसंस्थाया आर्थिक ग्वाहालि व सहकार्यय् सर्वेक्षण यायेत्यनागु संघं न्ह्यथंगु दु ।

संघया ४० क्वःगु वार्षिकोत्सवया लसताय् लाकाः ग्वसाः ग्वःगु ज्याझ्वलय् संघया प्रवक्ता प्रा घनश्याम भट्टराई नं संघं मिखालिसें न्हाय्पंया स्वास्थ्य सेवा नं शुरु यानागु जानकारी बियादिल । वय्कलं धयादिल, ‘ईकथं मिखाया स्वास्थ्य सेवायात उच्च् गुणस्तरीय याना यंकेत थःपिंसं न्हाय्पंया नं उपचार सेवा न्ह्याके धुंगु दु । थौंकन्हय् देय्या नीन्यागू मिखा उपचार केन्द्रय् न्हाय्पंया नं उपचार इकाई शुरु यायेगु तयारी जुयाच्वंगु दु ।संघया ३७ गू जिल्लाया १८ गू आँखा अस्पताल व ८० गू आँखा उपचार केन्द्रपाखें मिखाया स्वास्थ्य सेवा प्रवाह जुया वयाच्वंगु दु । उगु अस्पताल व केन्द्रपाखें दँय्दसं ४० गू लाख स्वयां अप्वःसिं बहिरंग सेवा, निगू लाख न्यय्द्वः स्वयां अप्वःसिया मिखाया शल्यक्रिया यायेगु ज्या जुयाच्वंगु संघं जानकारी बिउगु दु ।

बिपी कोइराला लायन्स नेत्र अध्ययन केन्द्रया कार्यकारी निर्देशक प्रा. डा. आनन्दप्रसाद शर्मां नेपाःया मिखा सम्बन्धी स्वास्थ्य क्षेत्रय् नेत्रज्योति संघं बिया वयाच्वंगु योगदान च्वछायेबह जूगु धासें लिपांगु इलय् उपचार सेवालिसें नेत्र चिकित्स शिक्षायात नं न्ह्यःने यंकूगुलिइ कृतज्ञता ज्ञापन यानादिल ।मिखा सम्बन्धी दक्ष जनशक्ति उत्पदानया निंतिं चिकित्सा विज्ञान अध्ययन प्रतिष्ठान (न्याम्स)या सम्बन्धनय् नेत्र विशेषज्ञ व दृष्टि विशेषज्ञ, प्राविधिक शिक्षा व व्यवासायिक तालिम परिषद् (सीटीइभीटी) पाखें नेत्र सहायकया शैक्षिक ज्याझ्वःत नं संचालन जुया वयाच्वंगु दु । देय्न्यंकं ९९ नेत्र विशेषज्ञ, ३८ दृष्टि विशेषज्ञ, २१० नेत्र सहायक व १५४ आई वर्कर संघ अन्तर्गतय् क्रियाशील जुयाच्वंगु दु ।

सन् १९८१ लय् नेपालय् न्हापांखुसी मिखां मखनीगु ल्वय्या सर्वेक्षण यायेगु ज्या जूगु खः । उगु सर्वेक्षणय् नेपाःया कुल जनसंख्याया शुन्य दशमलव ८४ प्रतिशत दृष्टिविहनी दुगु व १ दशमलव ७ प्रतिशतया छगः मिखा दृष्टिविहीन जूगु लुया वःगु खः । अथे हे १ दशमलव ८५ प्रतिशत न्यून दृष्टिया समस्या दुपि, ९२ प्रतिशत दृष्टिविहीन ग्रामिण क्षेत्रय् दुगु व ८० प्रतिशत मिखां मखनीगु ल्वय्या रोकथाम याये फइगु वा उपचार सेवापाखें पने फइगु स्थिति दुगु उगु ईया सर्वेक्षणं क्यंगु खः ।
सन् २०११ य् लिपांखुसी याःगु मिखाया स्वास्थ्य सम्बन्धी सर्वेक्षणया प्रतिवेदनकथं नेपालय् शुन्य दशमलव ३५ प्रतिशत जनता मिखां मखनीगु ल्वचं कःपिं दुगु सीदुगु दु ।