नेदरल्यान्डं युक्रेनयात ३-२ गाेलं बुकल
येँ – युराे कपया समूह बी अन्तर्गत अाइतवाः चान्हय् जूगु सनसनीपूर्ण कासाय् नेदरल्यान्डं युक्रेनयात ३-२ गाेलं बुकूगु दु । निगू गाेलं ल्यूने लायेधुंकूगु युक्रेनं न्यागू मिनेट दुने निगू गाेल यानाः कासा बराबरीइ हःगु खः, तर कासा क्वचायेत न्यागू मिनेट ल्यं दनिबलय् छगू गाेल यासें नेदरल्यान्डं कासाय् विजय चूलाकूगु खः ।
कासाया न्यागुलिं गाेल निगूगु हाफय् जूगु खः । न्हापांगु हाफय् नेदरल्यान्डं युक्रेनयात दबाबय् तःगु खःसां गाेल याये मफयाच्वंगु खः । तर निगूगु हाफ सुरू जूगु न्हयगू मिनेट दुने हे नेदरल्यान्ड पाखें न्हापांगु गाेल जुल । कासाया ५२ अाैं मिनेटय् जर्जिनियाे विनाल्डुमं न्हापांगु गाेल याःगु खः । मेम्फिस डेपें याःगु प्रहार युक्रेनया गाेलकिपर जर्जिय बुस्चेनं पंगु खःसा रिबाउन्डय् वःगु बलयात विनाल्डुमं पाेस्टय् दुछ्वयाबिउगु खः ।
थ्वयां खुगू मिनेट लिपा हे वउट वेग्राेस्टं छगू गाेल यासें नेदरल्यान्डयात निगू गाेलं अग्रता बिउगु खः ।
तर थ्वयां ७ मिनेट लिपा ७५ अाैं मिनेटय् युक्रेनया अान्द्रिय यारमाेलेन्काें गाेल यासें डच अग्रता चिब्या यानाबिलसा थ्वयां प्यंगू मिनेट लिपा हे राेमन यारेम्चुकं हेड गाेल यासें कासा बराबरीइ हःगु खः । रूस्लान मालेनाेभ्स्कीं थ्वाःगु फ्रीकिकय् यारेम्चुकं सुन्दर हेड यासें गाेल याःगु खः । तर युक्रेनं तःधंगु संघर्ष लिपा कासा बराबरी हयेत ताःलाःगु खःसा थ्व न्यागू मिनेट नं तिके मजुल । कासाया ८५ अाैं मिनेटय् डेन्जेल डम्फ्रिसं हेड पाखें हे गाेल यासें नेदरल्यान्डयात विजय चूलाकाबिल । कासाया न्हापांगु हाफय् डेम्फ्रिसयात छगू सुन्दर पास वःगु, तर वं याःगु हेड पाेस्टं पिने लाःवंगु खः । उबलय् असफल जूसां कासाया अन्तय् वयाः हेड पाखें हे गाेल यासें डेम्फ्रिसं नेदरल्यान्डयात विजय चूलाकाबिउगु खः ।
नेदरल्यान्ड व युक्रेन दथुया थ्व कासा थुगुसीया युराेकपय् अाःतक दकलय् अप्वः गाेल जूगु कासा नं खः ।
थ्वयां न्ह्यः जूगु कासाय् अस्ट्रियां मेसेडाेनियायात ३-१ गाेलं बुकूगु खः ।
LEAVE YOUR COMMENTS