भारतयात बुके फइला ?

थनिं प्यन्हु लिपानिसें दशरथ रंगशालाय् मिस्तय् साफ च्याम्पियनसिप २०२२ न्ह्यायेत्यंगु दु । नेपाःया फुटबलया नितिं लिपांगु छुं ई छतिं बांलानाच्वंगु मदु । अखिल नेपाल फुटबल संघ (एन्फा) य् न्हूगु नेतृत्व वयेवं खालि विवाद हे जक जुयाच्वन, छगू लिपा मेगु । भचासां बांलाःगु ख“ छु धाःसा आः सकसियां मिखा मैदानय् जुइगु फुटबलय् जुइ, मैदानपिनेया फुटबल राजनीतिइ मखु । निवाःया थ्व च्याम्पियनसिपया झ्वलय् फुटबल यःपिंत थुकिं अःपुक हे थःथाय् साला काइगु निश्चित दु ।

थःगु हे भूमिइ जुइत्यंगु थ्व च्याम्पियनसिपयात कयाः न्ह्यसः धयागु छतायां छता हे खः, छु नेपाः थुकिया च्याम्पियन जुइ फइ ला ? थुकिया लिसः हाकनं मेगु छगू न्ह्यसलय् सुलाच्वंगु दु । अले व न्ह्यसः खः, छु नेपाःया टिमं भारतयात बुके फइ ला ? मिस्तय् साफ च्याम्पियनसिपया इतिहास तसकं ताःहाकः मजूनि । सन् २०१० तक जक लिहांवंसा गाः । उबलय् हे खः, दकलय् न्हापांगु मिस्तय् साफ च्याम्पियनसिप जूगु । थ्व धुंकाः न्याक्वः तक जुइ धुंकल ।

आः जुइगु खुक्वःगु संस्करण खः । थ्व फुक्कं साफय् छतायां छता जक ख“ दु, व खः, भारतया एकछत्र प्रभुत्व । अथे नं दक्षिण एशियाय् भारत हे छगूयां छगू फुटबल महाशक्ति खः । मिस्तय् फुटबलय् ला भारतनाप सुना नं चुनौति बीमफु । उकिं हे ला खः, आः तक गुलिं नं संस्करणया मिस्तय् साफ च्याम्पिनयसिप जुल, उकी भारत हे जक च्याम्पियन जूगु दु । मेपिंसं छुं हे यायेमफु । अनलिं वइ, नेपाःया हे टिम । नेपाः प्यक्वः तकया उप–विजेता खःसा छक्वः बंगलादेश उपविजेता जूगु दु ।

उकिं नेपाःया मिखां जक मखु, मुक्कं च्याम्पियनसिपयात कयाः नं न्ह्यसः धयाःगु व हे खः, भारतयात सुनां नं बुकेफइ ला ? सन् २०१६ या छगू संस्करणय् नेपाः फाइनल मथ्यं । नेपाः सेमिफाइनलय् हे पराजित जुल । अले व नं भारतनाप हे । संयोग धायेमाः उब्लेया प्रशिक्ष्ँक कुमार थापा हाकनं छक्वः मिस्तय् टिम स्वयेत लिहां वःगु दु । छगू कथं धायेगु खःसा मिस्तय् साफ च्याम्पियनसिपया इतिहासय् कुमार नेपाःया दकलय् असफल प्रशिक्षक खः, छाय्धाःसा वया टिम सेमिफाइनल धुंकाः हे छे“ लिहां वयेमाल ।

‘थ्व ल्याखं ला जि असफल प्रशिक्षक हे खः,’ कुमार थुलि धायेत मछाः मजू । तर उकी तनाः धायेगु याः, ‘जिगु निंतिं व सेमिफाइनल नं ला फाइनल हे खः । न्ह्यागु जुइमाः, जि भचा भाग्यमानी प्रशिक्षक खः, छाय्धाःसा जित हाकनं छक्वः मिस्तय् राष्ट्रिय फुटबल टिम स्वयेगु अवसर चूलात । उकिं जि लय्ताः । अले थ्व हे अवसरं जितः नेपाःयात दकलय् न्हापां थःगु हे भूमिइ साफ च्याम्पियनसिप त्याकेगु मेगु अवसर नं बिउगु दु । जिगु दाबी दु, उपाधि त्याकेत फुक्क कथं कुतः याये ।’

थ्व पालय्या संस्करणय् दक्षिण एसियाया न्हय्गुलिं टिमं ब्वति कयाच्वंगु दु । थुकीया न्हापांगु ग्रुप ‘ए’ य् दु, डिफेन्डिङ च्याम्पियन भारतनापं बंगलादेश, माल्दिभ्स व पाकिस्तान । अले निगूगु ग्रुप ‘बी’ दु, नेपाः नापं भुटान व श्रीलंका । मंगलवाः जुइगु न्हापांगु कासाय् नेपाःया टिमं भुटानविरुद्ध म्हिती । निगुलिं ग्रुपं निगू निगू टिम सेमिफाइनलय् थ्यनी, थःगु पुचलय् न्हापांगु निगू थासय् लाःपिं । थ्व ल्याखं सेमिफाइनलय् नेपाःया टिमं बंगलादेश, अले भारतं श्रीलंकाविरुद्ध म्हितीगु खनेदु ।

थ्व ला छगू अनुमान जक हे खः । छुं न्हि न्ह्यः तकं भारतं म्हितीगु खः अथवा मखु धयागु हे निश्चित मजुयाच्वंगु खः । भारत मवःसा ला नेपाःया टिमं उपाधि हे त्याकीगु जुइ धकाः धयावयाच्वंगु दु । तर भारतया फुटबलय् लानाः च्वंगु फिफाया प्रतिबन्ध मदयेवं वया टिम वइगु निश्चित जूगु खः । हाकनं भारत मदुगु च्याम्पियनसिपय् सुना नं थः च्याम्पियन धकाः दाबी यायेबलय् मज्जा हे छु दइ धकाः ? उकिं प्रशिक्षक कुमारया ख“ थें, भारतं म्हितेगु जुसेलिं थुकिया महŒव हे अप्वःगु दु ।

अले न्ह्यसः व हे कायम दु, ‘छु भारतयात सुना नं बुके फइ ला ?’ साफ च्याम्पियनसिपय् नेपाःया प्रदर्शन नं थःगु थासय् तसकं बांलाः । भारत त्वताः मेपिं फुकसितं बुकूगु दु । तर भारतयात धाःसा च्याम्पियनसिपया इतिहासय् गुब्लें बुकेफुगु मदुनि । नेपाः व भारत दथुइ आः तक साफ च्याम्पिययनसिपय् न्याक्व कासा जुल, न्याक्वलं भारत हे त्यात । समग्र इतिहासय् नेपाःया टिमं छक्वःयां छक्वः जक भारतयात बुकूगु दु । तर थ्व हे कथंया जित धाःसा च्याम्पियनसिपय् चूमलानी ।

थुकी हे मेगु छगू नं न्ह्यसः स्वानावइ । नेपाःया टिमं भारतयात बुकेगु सम्भावनाया कारण छु खः ले ? थुकिया निता स्वता लिसः दु । दकलय् न्हापां ला नेपाःयात भारतीय टिमयात बुकेगु आः थे बांलाःगु अवसर हाकनं वइमखु, छाय्धाःसा नेपाः थःगु देशय्, दशरथ रंगशालाय् म्हिताच्वंगु दु । अपार समर्थकतय् दथुइ नेपाःया टिमं भारतयात बुकेफु । अले नेपाःया प्रशिक्षकनिसें कासामितय्त नं ईख छताः दु– भारतयात छक्वः बुकाः च्याम्पियनसिप त्याकेगु ।

धात्थें, भारतयात बुके फइ ला ? व आः छुं न्हि लिपा हे सीदइ ।

सम्बन्धित बुखँ

LEAVE YOUR COMMENTS