अर्जेन्टिना असफल, फ्रान्स क्वार्टरफाइनलय्

एजेन्सी- लियोनल मेसीया अर्जेन्टिना विश्वकप विना छेँय् लिहां वंगु दु । थौं नकतिनि जूगु कासाय् फ्रान्सं अर्जेन्टिनायात ४–३ गोलं बुकल । तसकं प्रतिस्पर्धात्मक कासाय् फ्रान्स कासाया १४ औं मिनेटय् हे पेनाल्टिपाखें अग्रता काःगु खः । अर्जेन्टिनायात नकआउट चरणय् यंकेगु निंतिं नाइजेरिया विरुद्ध गोल याःम्ह मार्कोस रोजों फ्रान्सया स्ट्राइकर काइलेन एमबाप्पेयात डिबक्सय् क्वःदयेकेवं पेनाल्टि बिउगु खः । एन्टिनियो ग्रिजम्यानं पेनाल्टिइ गोल यासें फ्रान्सयात अग्रता बिउगु खः । तर न्हापांगु हाफ क्वचाये न्ह्यः एन्जेलो डे मारियों उत्कृष्ट गोल यासें कासा बराबरीइ यंकल । ३० यार्डं शक्तिशाली प्रहार यासें मारियों बराबरीइ गोल याःगु खः ।

निगू हाफ सुरु जूगु निगू मिनेट अर्जेन्टिनां अग्रता काःगु खः । अर्जेन्टिनायात वःगु फ्रिकिकयात क्लियर यानाहःगु बल अनमार्क जुयाच्वंम्ह मेस्सीयाथाय् थ्यंगु खः । मेस्सीं थ्वाःगु बल रोजोया तुतिइ लानाः गोल जूगु खः ।

थ्व गोल जूगु १० मिनेट लिपा हे फ्रान्सया डिफेन्डर बेन्जामिन पाभर्डं डि मारियां थें शक्तिशाली प्रहार यासें कासा बराबरीइ हयाबिल । सन् १९९८ लिपा सुं नं फ्रान्सया डिफेन्डरं गोल याःगु थ्व न्हापांखुसी खः । १९९८ य् फ्रान्सया डिफेन्डर लिलियन थुरामं गोल याःगु खः । कासाया ६४ औं मिनेटय् फ्रेञ्च टिनएजर एमबाप्पें उत्कृष्ट गोल यानाः फ्रान्सयात अग्रता बिल । थ्वयां ४ मिनेट लिपा हे एमबाप्पें थःत विश्वया उत्कृष्ट कासामि धयागु प्रमाणित यासें मेगु गोल यानाः फ्रान्सयात ४–२या अग्रता बियाबिल । थ्व गोल एमबाप्पेया थ्व विश्वकपय् स्वंगूगु गोल खः ।

कासा क्वचायेत्ययेकाः अर्जेन्टिनायात निंतिं सब्स्टिच्यूटय् वःम्ह सर्जियो अग्युएरों छगू गोल यात । मेस्सीया बांलाःगु पासय् अग्युएरों इन्जुरीया ईया ९३ औं मिनेटय् गोल याःगु खः ।