डिफेन्डिङ च्याम्पियन जर्मनी विश्वकपं पिने
एजेन्सी- डिफेन्डिङ च्याम्पियन जर्मनी विश्वकपया न्हापांगु चरणं हे पिने लाःवंगु दु । नकतिनि क्वचाःगु कासाय् दक्षिण कोरियापाखें २–० गोलं पराजित जूगु जर्मनी मेगु कासाय् स्वीडेनं मेक्सिकोयात बुकेवं न्हापांगु चरणं पिने लाःवंगु खः ।
समूह एफ अन्तर्गत थौं जूगु कासा स्वीडेन मेक्सिकोयात ३–० गोलं बुकेवं स्वीडेन व मेक्सिको ६–६ ल्याः कयाः नकआउट चरणय् दुहां वंगु खः । थ्व समूहय् जर्मनी व दक्षिण कोरिया ३–३ अंक जूगु दुसा जर्मनी गोल अन्तरं नं दकलय् लिउने लाःवंगु खः ।
विश्वकपया न्हापांगु कासाय् हे जर्मनी मेक्सिको पाखें १–० गोलं बूगु खःसा स्वीडेनयात धाःसा २–० गोलं बुकूगु खः ।
विश्वकप फुटबलय् डिफेन्डिङ च्याम्पियन थुकथं न्हापांगु चरणं पिने लाःवंगु थ्व प्यक्वःगुखुसी खः । थ्वयां न्ह्यः सन् २००२ लय् डिफेन्डिङ च्याम्पियन फ्रान्स, सन् २०१० य् डिफेन्डिङ च्याम्पियन इटली न्हापांगु चरणं पिने लाःगु खःसा सन् २०१४ य् डिफेन्डिङ च्याम्पियन स्पेन न्हापांगु चरणं पिने लाःगु खः ।
जर्मनीं थौंया कासाय् कमजोर धयातःगु दक्षिण कोरियायात पूवंक दबाबय् लाकातःगु खःसां काउन्टर एट्याकय् दक्षिण कोरियां निगू गोल याःगु खः । कोरियाया निंतिं किम योङ गोनं कासाया ९२ औं मिनेटय् व सन ह्युङ मिनं कासाया ९६ औं मिनेटय् गोल याःगु खः । कोरियां न्हापांगु गोल याःबलय् जर्मनीं अफसाइडया अपिल याःगु खःसां भिडियो एसिस्टेन्ट रेफ्री (भार) प्रविधीपाखें स्वयाः गोल बिउगु खः । निगूगु गोल जर्मनीया गोलकिपर कुहां वयाः म्हितः वयाच्वंगु इलय् लङ पासय् वःगु बलयात ह्युनं खाली पोस्टय् गोल याःगु खः ।
LEAVE YOUR COMMENTS