स्वयम्भूइ सप्तविधानुत्तर पुजा

येँ(नेपालभाषा टाइम्स)वरिष्ठ तथा ज्येष्ठ नागरिक समाज येँ महानगरपालिका १५ वडापाखें स्वयम्भू महाचैत्य परिसरय् सप्तविधानुत्तर पुजा याःगु दु । लछियंंकं न्ह्यानाच्वंगु नेवाः बौद्धमार्गीतय् तःजिगु पर्व गुंलाया झ्वलय् लाकाः उगु पुजा याःगु खः ।

समाजपाखें ग्वसाः ग्वःगु पुजाय् मूलाचार्य, उपाध्याय व मेमेपिं गुरुजुपिंसं मंकाःकथं पुजा यानादीगु खः । समाजया नायः शारदामुनि वज्राचार्ययाकथं बौद्ध धर्मया अनुयायीतय्सं थीथी प्रकार याइगु आपालं पुजामध्ये सप्तविधानुत्तर पुजा छगू नांजाःगु व लोकंह्वाःगु पुजा खः । सप्तविधानुत्तर नांकथं न्हय्गू व थीथी विधानकथं पुजा याइगु वय्कलं कनादिल ।

पूजाविधि अन्तर्गत वज्रयानी अभ्यासय् प्यंगू तन्त्र बमोजिम क्रियातन्त्र, चर्यातन्त्र, योगतन्त्र व अनुत्तर योगतन्त्र दुथ्यानाच्वंगु दु । सप्तविधानुत्तर पुजायात उच्च श्रद्धा व आस्था तयाः याइगु पुजाया रुपय् कायेगु यानातःगु दु ।
नायः वज्राचार्ययाकथं थःलिसें सकल प्राणी जगतया हित, जगतोद्धार, थीथी ग्रह दशा फायेकेगु व सुख, शान्तिया निंतिं थ्व पुजा यायेगु याइ । सुख, दुःख, बुन्हि लिसें थीथी ग्रह, दशा, कलश जुल धाःसा थ्व पुजा यायेगु चलन दुगु वय्कलं कनादिल ।

सम्बन्धित बुखँ

LEAVE YOUR COMMENTS