रसुवागढी व साञ्जेल नं जनताया जलविद्युत आयोजनाय्

येँ – रसुवागढी व साञ्जेन जलविद्युत आयोजनायात नं सरकारं जनताया जलविद्युत कार्यक्रमय् दुथ्याकूगु दु । कार्यक्रमया मंगलवाः च्वंगु बैठकं थ्व निगू आयोजनायात नं जनताया जलविद्युतय् दुथ्याकाः शेयर पितबीगु क्वःछिउगु खः ।सरकारं वंगु फागुन २ गते जनताया जलविद्युत कार्यक्रम अन्तर्गत १९ गू आयोजना ल्ययाः ३५०० मेगावाट क्षमता बराबरया आयोजना दयेकेगु निंतिं सर्वसाधारणपाखें स्वपुँजीया ४९ प्रतिशत शेयर मुंकेगु क्वःछिउगु खः ।

थ्व निर्णय कथं वैगु चैत ७ गते माथिल्लो त्रिशुली थ्री बीया शेयर पितबीधुंकूगु दु । ऊर्जा, जलस्रोत तथा सिँचाइ मन्त्रालयय् च्वंगु बैठकं कार्यविधिइ आवश्यक संशोधन यानाः शेयर पितबीगु क्वःछिउगु खँ मन्त्री वर्षमान पुनं धयादीगु दु । थ्व आयोजना पाखें कर्मचारी संचय कोषया कर्मचारी, सञ्चयकर्ता, नेपाल विद्युत प्राधिकरणया कर्मचारी व चिलिमे जलविद्युत कम्पनीया कर्मचारीतय्त शेयर मीधुंकूगु दुसा याकनं सर्वसाधारणया निंतिं नं शेयर पित हयेगु तयारी यानाच्वंगु खः ।

नेपाल धितोपत्र बोर्ड नं थुपिं निगुलिं आयोजनायात वंगु चैत १० गते हे सर्वसाधारण शेयर पित बीत स्वीकृति बियातयेधुंकूगु दु । बोर्डं साञ्जेनयात ५४ करोड ७५ लाख तका बराबरया ५४ लाख ७५ हजार कित्ता व रसुवागढीयात १ अर्ब २ करोड ६३ लाख १५ हजार तका बराबरया १ करोड २ लाख ६३ हजार १५० कित्ता शेयर पितबीत अनुमति बियातःगु दु ।

साञ्जेनय् रसुवाय् १४.८ मेगावाटया माथिल्लो साञ्जेन व ४२.५ मेगावाटया साञ्जेन जलविद्युत आयोजना दयेकाच्वंग्ु दु । अथेहे रसुवागढीं १११ मेगावाटया जलविद्युत आयोजना दयेकाच्वंगु दु । थ्व आयोजनाया ७० प्रतिशत ज्या क्वचायेधुंकगु खँ धाःगु दु । थ्व निगुलिं आयोजना चिलिमे जलविद्युत आयोजनां दयेकाच्वंगु खः ।

सम्बन्धित बुखँ

LEAVE YOUR COMMENTS