थप कार्यक्रम घोषणा,थौं न्हूसतकं खबरदारी ¥याली

येँ – गुथि विधेयक हयाः सरकारं नेवाः संस्कृतिइ प्रहार याःगु धासें स्वनिगःया नेवाःतय्सं हानं थप आन्दोलनया घोषणा याःगु दु । म्हिगः थुकिया बारे थीथी आन्दोलनकारी पुचःतय् दथुइ च्वंगु मुँज्यां थप आन्दोलन घोषणा याःगु खः । मुँज्याय् न्ववासें नेवाः न्ह्यलुवा मल्ल के. सुन्दरं नेवाःतय् गुथिइ सरकारं याःगु हस्तक्षेप स्वीकार्य मजुइगु खँ कनादिल ।

सरकारं गुथियात स्वायत्तता बीमाः धासें गुथियात धर्म लिसे, जग्गा जमिन लिसे स्वानाः सरकारं प्रचार यानाच्वंगु गलत जूगु खँ नं वय्कलं कनादिल । अथे हे वय्कलं गुथि धइगु संस्कृति व पहिचान खः धासें गुथियात भूमिसुधार मन्त्रालय दुने तयेगु पाय्छि मजूगु तर्क नं तयादिल ।

वरिष्ठ अधिवक्ता लिसें आदिवासी जनजाति वकिल पुचः लाहुर्निपया महासचिव शंकर लिम्बु, ज्यापु समाज यलया नायः लिसें पुलांम्ह सांसद चन्द्र महर्जन, विवेकशील साझा पार्टीया प्रदेश सांसद विकासभक्त श्रेष्ठपिंसं नं ज्याझ्वलय् न्ववानादीगु खः । ज्याझ्वः नेवाः न्ह्यलुवा डा. महेशमान श्रेष्ठया सभापतित्वय् जूगु खः ।

म्हिगःया भेलां थीथी कथंया आन्दोलनया नं घोषणा याःगु दु । म्हिगः घोषणा जूगु आन्दोलनया ज्याझ्वः कथं थौं स्वनिगःया थीथी लागाय् गुथि विधेयक व नेवाः सरोकारया कयाः थौं थीथी थासय् कोणसभा याइगु जूगु दु । उकथं हे असार १४ गते ¥याली पिकाइगु ग्वसाः दु । असार २० गते मरुत्वाःया महाद्यः–पार्वती देगः न्ह्यःने सभा यायेगु नं क्वःछिउगु दु ।

लिसें भेलां विधेयकयात कयाः कानुनविद व स्वनिगलय् दुगु गुथिलिसे नं सहलह यायेगु, स्वनिगःन्यंकं मोटरसाइकल ¥याली यायेगु घोषणा याःगु दु ।म्हिगः घोषणा याःगु ज्याझ्वः कथं थौं असार ९ गते येँया न्हू सतकं छगू खबरदारी ¥याली पिकायेगु नं तयारी जुयाच्वंगु दु । थौं खबरदारी ¥याली पिकयाः देय्चाःहिलेगु ज्याझ्वः तयातःगु दु ।

गुथि विधेयकयात कयाः कन्हय् असार १० गते घोषणा यानातःगु स्वनिगः बन्द ज्याझ्वःयात धाःसा थ्व आन्दोलनपाखें समर्थन वा विरोध छुं नं मयाइगु खँ धाःगु दु । बन्दया झ्वलय् आन्दोलन स्वयां पिनेया माग नं न्ह्यःने वःगु जुयाः थुकियात समर्थन याये मफइगु खँ आन्दोलनकारीतय्सं धाःगु दु ।

थ्वहे झ्वलय् मेखे राष्ट्रिय सभापाखें म्हिगः सञ्चार माध्यमय् सुचं हे पिकासें गुथि विधेयकयात कयाः सुझाव बिउ वा धकाः आह्वान पिकाःगु दु । संसदपाखें छुं नं विधेयकयात कयाः थथे सार्वजनिक रुपं सुझाव आह्वान याःगु थ्वहे न्हापांखुसी खः । थ्व स्वयां न्ह्यः छुं नं विषययात कयाः उजुरी दुसा बिउ वा धकाः आह्वान याःसां विधेयकयात हे कयाः आह्वान जूगु धाःसा थ्वहे न्हापांखुसी खः धाःगु दु ।

सरकारं आन्दोलन यानाच्वंगु पुचःतय्त धाःसा आः तक वार्ता वा संवाद वा सुझावया लागिं सःतूगु मदुनि । अथे खःसां आः थःपिंत गज्याःगु विधेयक आवश्यक खः धइगु खँयात कयाः आन्दोलनकारीतय्सं कानूनविद्त तयाः सहलह ब्याकेगु ज्या धाःसा शुरु यायेधुंकूगु दु ।