भेरो सेल खोप बीगु ज्याझ्वः स्थगित

येँ- येँ महानगरपालिकाया स्वीनिगुलिं वडाया खोप केन्द्रपाखें बिया वयाच्वंगु कोरोना विरुद्धया खोप ज्याझ्वः स्थगित याःगु दु । येँ महानगरपालिकाया शहरी जनस्वास्थ्य महाशाखां छगू सुचं जारी यासें खोप ज्याझ्वः स्थगित यानागु जानकारी बिउगु खः । महाशाखां मेगु सुचं जारी मजूतलेया निंतिं खोप ज्याझ्वः स्थगित यानागु जानकारी बिउगु दु

वंगु जेठ २५ गतेनिसें न्हापांगु मात्राया खोप काये मखंपिं ६० दँनिसें ६४ दँ उमेर समूहयात लक्षित यानाः महानगरया स्वीनिगुलिं वडाया खोप केन्द्रपाखें खोप ज्याझ्वः न्ह्याकूगु खः । थ्व स्वयां न्ह्यःया खोप ज्याझ्वलय् खोप काये मखंपिंत चिनिया खोप ‘भेरो सेल’या न्हापांगु मात्रा जेठ २५ गतेनिसें बीगु शुरु याःगु खःसा म्हिगः शुक्रवाःनिसें उगु ज्याझ्वः स्थगित याःगु खः ।

जिल्लाया निंतिं फ्यानातःगु खोपया मात्रा सिधःगु धइगु स्वास्थ्य सेवा विभागपाखें पौ वयेवं येँ महानगरपा जनस्वास्थ्य महाशाखां खोप ज्याझ्वः स्थगित यानागु जानकारी बिउगु खः । महाशाखाया प्रमुख हरिबहादुर कुँवरं ल्हाःचिं तयाः जारी यानादीगु सुचनय् नेपाल सरकारया निर्णयकथं कोभिड–१९ विरुद्धया भेरो सेल खोप अभियान थ्व हे मिति २०७८ जेठ २५ निसें २०७८ जेठ २९ तक संचालन यायेगु निर्णयकथं ६० निसें ६४ दँ उमेर समूहया नागरिक लगायतयात खोप बीगु ज्याझ्वः जुया वयाच्वंगुलिइ स्वास्थ्य सेवा विभागपाखें जेठ २८ निसें जिल्लायात फ्यानातःगु भेरो सेल खोपया पूरा जुइधुंकूगुलिं मेगु सुचं प्राप्त मजूतलेया निंतिं जेठ २८ गतेनिसें हे महानगरया दक्वं वडाया खोप केन्द्रपाखें संचालन जुयाच्वंगु खोप ज्याझ्वः स्थगित जूगु जानकारी बियाच्वना धयातःगु दु ।

वंगु जेठ २५ गते लक्षित उमेर समूहकथं न्हापांगु दिं ६४ दँयापिंत थ्व खोप बिउगु खःसा अनंलि २६ गते ६३, २७ गते ६२ दँयापिंत थ्व खोप बिउगु खः । महाशाखां दक्वं वडा ज्याकूयात छगू परिपत्र यासें क्वःछिनातःगु उमेर समूह बाहेकं थ्व स्वयां न्ह्यः न्हापांगु मात्रा काये मखंपिं व विरामीया प्रत्यक्ष सम्पर्कय् दुपिं स्वास्थ्यकर्मी, मेडिकल कलेजया विद्यार्थी, इन्टर्न व अन्डर जब ट्रेनिङ कयाच्वंपिं नर्सिङ व

प्यारा मेडिक्सलिसें थ्व स्वयां न्ह्यः भेरो सेलया न्हापांगु मात्रा कयाः निगूगु मात्रा काये त्वःफिउपिंत म्हसीका पौया लिधंसाय् खोप कायेत व बीत इनाप याःगु खः । खोप ज्याझ्वः स्थगित जुइवं आः ६० व ६१ दँ दुपिं उमेर समूहयापिं त्वःफिइगु जूगु दु ।

सम्बन्धित बुखँ

LEAVE YOUR COMMENTS