लुँया भावय् हानं न्हूगु कीर्तिमान !

येँ – लुँया भाः थहां वनाः हाकनं न्हूगु रेकर्ड कायम जूगु दु । म्हिगः छापावाला लुँ प्रतितोला न्यासः थहां वनाः ६५ हजार ५०० तका कायम जूगु दु । अमेरिका व चीन दथुइ ब्वलनाच्वंगु व्यापार युद्ध, अमेरिकां इरानय् आक्रमण यायेगु निंतिं गल्फ एरियाय् द्वःछिम्ह सेना छ्वयेगु निर्णय लिपा विश्व बजारय् लुँया भाः थहां वंगु खः ।

भाः थहां वनाः आः लुँ न्याइपिं ग्राहक म्हो जूगु दुसा मीपिं धाःसा अप्वःगु दु । अन्तर्राष्ट्रिय बजारय् सन २०१९ या अन्तपाखे प्रति औंस लुँ १४०० अमेरिकी डलर थ्यनीगु अनुमान यानातःगु खःसा उगु अनुमान स्वयां न्ह्यः हे प्रतिऔंस १४३५ डलर थ्यंगु दु ।

इहिपाया मौसमय् लुँया भाः थहां वनाः बजारय् लुँ न्याइपिं स्वयां नं मीपिं अप्वयाच्वंगु खँ नेपाल सुनचाँदी व्यवसायी महासंघया पुलांम्ह अध्यक्ष तेजरत्न शाक्यं ‘नेपालभाषा टाइम्स’ यात कनादीगु दु । वय्कःया कथं थौंकन्हय् लुँया कारोवार २५ निसें ३० प्रतिशत जक जुयाच्वंगु दु ।

भाः याकनं कुहां वयेफइगु सम्भावना दुसां इरान व अमेरिका तनावं उकियात लिच्वः लाकीगु खँ कँसेंं तनाव अप्वया वन धाःसा लुँ तोलां ७० हजार तक थ्यनेफइगु अनुमान नं वय्कलं यानादिल । वय्कःया कथं म्हिगः लुँया वास्तविक भाः ६६ हजार खःसां संघं ६५,५०० तका जक कायम याःगु खः ।