अप्वःथें बैंकया शेयर भाः कुहांवल

येँ – शेयर बजाः निरन्तर कुहां वंगुलिं यानाः वाणिज्य बैंकया शेयर भाः साधारणया शेयर भाः थ्यनिगु अवस्थाय् थ्यंगु दु । लिपांगु इलय् प्यंगू वाणिज्य बैंकया शेयर भाः साधारण शेयरया भावय् थ्यंगु खः । बजारय् छुं न्हिं न्ह्यवंनिसें सिभिल बैंक, सेन्चुरी कमर्शियल बैंक, जनता बैंक व मेगाव बैंकया शेयर भाः प्रतिकित्ता १०० तकाय् थ्यनीगु अवस्था वःगु खः ।

थुगु बैंक मध्ये दकलय् दंगु शेयर सिभिल बैंकया जूगु दु । सिभिलया प्रतिकित्ता १५१ थ्यंगु दु । अथेहे जनताया बैंकया १५९, सेन्चुरी बैंकया १७० व मेगा बैंकया १७५ तकां कुहां वंगु दु । छुं वाः न्ह्यः जक कारोबार खुले जूगु मेगाया शेयर २२८ तकां कारोबार जूगु खःसा आः कुहां वंगु खः ।

शेयर बजारय् दकलय् थिकेगु शेयर नविल बैंकया जुयाच्वंगु दु । नविलया प्रतिकित्ता शेयर ९५५ तकां कारोबार जूगु दु । स्ट्याडर्ड चाटर्ड बैंकया प्रतिकित्ता ७७५ कारोबार जुयाच्वंगु दु । अप्वः थें बैंकया शेयर २ सय निसें ५ सय तकां कुहां वयेधुंकूगु दु । ८ अर्ब चुक्ता पुँजी दुगु बैंकया शेयरया भाः अप्वः कुहां वयाच्वंगु दु ।

तर करोडय् पुँजी दुगु लघुवित्त संस्था, बीमा कम्पनीया शेयर भाः थहां वनाच्वंगु दु ।शेयर बजाः निरन्तर कुहां वयाः लगानीकर्ता धाःसा मारय् लानाच्वंगु दु । लगानीकर्तां अर्थमन्त्री युवराज खतिवडा शेयर बजाः प्रति सकारात्मक मजूगुलिं यानाः शेयर बजाः भाः कुहां वयाच्वंगु द्वपं बियाच्वंगु दु ।