विवादित न्यायाधीशतय्सं इजलास मत्वःतीगु

येँ – प्रतिनिधिसभा विघटन विरुद्ध लानाच्वंगु मुद्दाय् निम्ह न्यायाधीशपिं तेजबहादुर केसी व बमकुमार श्रेष्ठ बारे कानुनविद्तय्सं न्ह्यसः थंसां नं वय्कःपिंसं इजलास मत्वःतेगु स्पष्ट याःगु खँ सीदुगु दु ।

निम्ह न्यायाधीशया विषययात कयाः कानुनविद्तय्सं निरन्तर न्ह्यसः थना वयाच्वंगु खः । म्हिगः प्रधानन्यायाधीश चोलेन्द्रशम्शेर जबरां सर्वोच्च अदालतया मेपिं न्यायाधीशपिं लिसे सहलह यानादीगु खः । उगु इलय् प्रधानन्यायाधीशं न्ह्यसः ब्वलंपिं निम्ह न्यायाधीशपिंत थःपिसं हे निर्णय यानादिसँ धकाः धयादीगु खः । तर निम्हं न्यायाधीशपिंसं थःपिंसं इजलास मत्वःतेगु लिसः बिउगु खःसा
मेपिं निम्ह न्यायाधीशपिं दीपकुमार कार्की व आनन्दमोहन भट्टराईं धाःसा इजलास त्वःतेगु तयारी यानाच्वंगु
खँ सीदुगु दु ।

न्यायाधीशपिं केसी व श्रेष्ठं इजलास मत्वःतेगु अडान
कायेवं कार्की व भट्टराईनं इजलास त्वःतेगु निर्णय याःगु खः । निम्ह न्यायाधीशपिंस म्हिगः हे रोष्टरय् दुपिं मेपिं न्यायाधीशपिं लिसे नं सहलह यायेगु तयारी यानाच्वंगु दु । म्हिगः हे सहलहया तयारी जूगु खःसां नं सहलह धाःसा जुइ मफुगु खँ धाःगु दु ।
प्रतिनिधिसभा विघटनयात कयाः निम्ह न्यायाधीश इजलास त्वःतेगु वा मत्वःतेगु धइगु बारे थौं नं निर्णय यायेफइगु खँ धाःगु दु ।