प्रमाणीकरण मयाःगु खँय् राष्ट्रपतियात कारण देखाउ
येँ (नेपालभाषा टाइम्स)÷प्रतिनिधिसभा व राष्ट्रियसभां निक्वःखुसी पारित यानाः प्रमाणीकरणया निंतिं राष्ट्रपति विद्यादेवी भण्डारीयाथाय् छ्वःगु नागरिकता विधेयक पारित मयाःगु खाय् लाःगु रिटयात कयाः सर्वोच्चं कारण देखाउ आदेश जारी याःगु दु ।
सर्वोच्च अदालतया न्यायाधीश हरिप्रसाद फुयालया एकल इजलासं राष्ट्रपति कार्यालययात नागरिकता विधेयक प्रमाणीकरण मयानागु कारण पेश यायेत आदेश बिउगु खः । उकथं हे सर्वोच्च अदालतं उगु रिट अग्राधिकार सहित कारण देखाउ आदेश जारी याःगु खः ।
वंगु बिहीवाः दर्ता जूगु न्यागू मुद्दा शुक्रवाः हे पेशी क्वःछिनातःगु खः । न्यायाधीश मनोज शर्माया एकल इजलासय् पेशी क्वःछिनातःगु खःसां पाः मवयेवं म्हिगः पेशी क्वःछिउगु खः ।
सर्वोच्च अदालतय् बिहीवाः राष्ट्रपतियात विधेयक प्रमाणीकरणया निंतिं परमादेश बीत माग यासें न्यागू रिट दर्ता जूगु खः । अधिवक्ता सुनिलरञ्जन सिंह, सुनिलकुमार यादव, विजय पोखरेल, सागर बराल, त्रिभुवन विश्वविद्यालयया विद्यार्थी राज बराल लिसें काठमाडौं स्कुल अफ लया विद्यार्थी अविनेश अधिकारी, मोरङया देव शर्मा व सोनु रौनियारं मंकाः व बिस्कं बिस्कं रिट दर्ता याःगु खः ।
रिटय् संघीय संसदं निक्वःखुसी प्रमाणीकरण यानाः छ्वःगु विधेयक संविधानया सीमा झिंन्यान्हु दुने प्रमाणीकरण मयाःम्ह राष्ट्रपतियात प्रमाणीकरण या धइगु आदेश बीत माग यानातःगु खः ।
नागरिकता विधेयक प्रमाणीकरण यायेत न्हापांखुसी साउन १५ गते राष्ट्रपतियाथाय् छ्वःगु खःसा उकिया झिंन्यान्हु लिपा साउन २९ गते राष्ट्रपति भण्डारीं पुनर्विचार यायेमाःगु सन्देश लिसें संसदय् लित छ्वःगु खः । वयां लिपा निगुलिं सदनं विधेयक गथे खः अथे हे पारित यानाः भदौ २० गते हानं राष्ट्रपतियाथासय् छ्वःगु खः ।
संविधानया धारा ११३ (४) कथं निक्वःखुसी वःगु विधेयक राष्ट्रपतिं झिंन्यान्हुया दुने प्रमाणीकरण यायेमाःगु खः । तर राष्ट्रपति भण्डारीं प्रमाणीकरण मयासे संविधानया उगु प्रावधानयात हे निष्क्रिय यानाबिउगु दावी रिटय् न्ह्यथनातःगु दु ।
LEAVE YOUR COMMENTS