महानगरं अप्वयेकल परीक्षणया दायरा

येँ- येँ महानगरपालिकां कोरोना परीक्षणया दायरा अप्वयेकीगु जूगु दु । कोभिड १९या संक्रमण दर अप्वया वनाच्वंगु सन्दर्भय् परीक्षणया दायरा नं अप्वयेकेत्यंगु खः ।

वइगु न्यान्हुया दुने म्होतिं नं न्यय्द्वःया ल्याखय् परीक्षण यायेगु तयारी येँ मनपां यानाच्वंगु दु । इपिडिमियोलोजी तथा सरुवा रोग नियन्त्रण महाशाखाया सहकार्यय् वइगु जेठ १४ गतेनिसें १८ गतेतकया दुने न्यय्द्वःया एन्टिजेन विधिपाखें परीक्षण यायेगु तयारी जुयाच्वंगु येँ मनपां न्ह्यथंगु दु ।

न्यान्हुयंकं न्हियान्हिथं १० गू केन्द्रपाखें एन्टिजेन विधिं नमूना संकलन याइगु जुयाच्वंगु दु । थ्व न्यान्हुया दुने दक्वं वडाया जोखिमपूर्ण थासय् परीक्षण याये सिधयेकेगु लक्ष्य कयातःगु दु ।

एन्टिजेन विधिपाखें परीक्षण यायेबलय् तत्काल उकिया रिपोर्ट वइगु जूगुलिं जोखिम खने दुपिं संक्रमितयात थप परीक्षण व आइसोलेसनया माध्यमं समुदायपाखें बिस्कं तयेगु ज्या जुइ ।

येँ महानगरया दक्वं धइथें वडाय् ख्वातुगु बस्ती दुसा लिपांगु इलय् येँ महानगर दुने न्हियान्हिथं धइथें संक्रमितया ल्याः नं उतिकं अप्वया वनाच्वंगु दु ।

कोरोना भाइरसया न्हूगु भेरियन्टया संक्रमण तच्वया वनाः आपालं संक्रमित जुइवं उकियात त्वाःथलेगु ल्याखं येँ मनपां थुकथंया अभ्यासयात न्ह्यःने हःगु खः ।

थ्व स्वयां न्ह्यः कालिमाति तरकारि व फलफुल बजार व अनं लिपा तुकुचाया तरकारि बजारय् एन्टिजेन विधिपाखें परीक्षण याःगु खः । तःधंगु पुचलय् थुकथं परीक्षण यायेगु तयारी यानाच्वंगु येँ मनपां आःया जनशक्ति पर्याप्त मजूगु धासें जनशक्ति थप यानाः परीक्षण यायेत्यंगु खः ।
कोभिडया लक्षण खनेदुुपिं, कन्ट्याक्ट ट्रेसिंगय् लाःपिं, अग्रपंक्तिइ च्वनाः ज्या यानाच्वंपिं, निषेधाज्ञाया इलय् ज्या यानाच्वंपिं व जोखिमय् दुपिं सकसितं लक्षित यानाः थुगु परीक्षण यायेत्यंगु खः ।
परीक्षणया निंतिं येँ मनपा जनस्वास्थ्यं विभागं प्रारम्भिक योजना नं दयेकूगु दुसा योजनाकथं ततःधंगु १५ गू वडाय् प्रत्येकय् निगू निगू व चिचिधंगु १७ गू वडाय् छगू छगू केन्द्र तयाः परीक्षण याइगु जुयाच्वंगु दु ।

सम्बन्धित बुखँ

LEAVE YOUR COMMENTS