माओवादीया नेतृत्व अनन्तपाखें

येँ – अध्यक्ष केपी ओलीया नेतृत्वय् आः गठन जुइगु सरकारय् माओवादी मन्त्रीतय् नेतृत्व पार्टीया वरिष्ठ दुजः वर्षमान पुन (अनन्तं) याइगु खँ सीदुगु दु । माओवादीं थुगुसी अनन्तयात नेता दयेकाः सरकारय् छ्वयेगु बारे बिचाः यानाच्वंगु खँ सूत्रं धाःगु दु । अनन्तं थुगुसी माओवादीया आधार क्षेत्र जुयाच्वंगु रोल्पां प्रतिनिधिसभाया चुनाव त्याकूगु खः ।

माओवादी पुचःया नेतृत्व याइम्ह अनन्तयात सरकारय् उपप्रधानमन्त्रीया पद बीगु खँ सूत्रं धाःगु दु । तर वय्कःया मन्त्रालय छु जुइ धइगु खँ धाःसा सी मदुनि । सूत्रं धाः कथं थ्व स्वयां न्ह्यः अर्थमन्त्री जुयादीम्ह अनन्तं आः नं अर्थ मन्त्रालय हे कायेगु इच्छा यानादीगु दु ।

तर अर्थ मन्त्रालय प्रधानमन्त्रीया टीमयाके हे दयेमाःगु जूगुलिं अनन्तयात गृह बी फइगु अनुमान याःगु दु । वय्कः जनसेनाया पुलांम्ह डेपुटी कमाण्डर नं जूगु ल्याखं सुरक्षाया यक्व ज्ञान वय्कःयाके दयेमाःगु आशा याःगु दु ।

वय्कः बाहेक माओवादीपाखें देव गुरुङ, पम्फा भुसाल, चक्रपाणी खनालल, कमला रोका, हितबहादुर तामाङ, सुरेशकुमार राई, अमनलाल मोदी, बिना मगर आदिपिं नं मन्त्री जुइफुगु खँ धाःगु दु ।