मरुसतःया सिँ : छमा हे सिमाया सिँ खइ ला ?

येँ – भुखाय् ब्वयाः पिने अलपत्रय् लानाच्वंगु मरुसतःया सिँ आः सुरक्षित यानाः तइगु जूगु दु । वा वयेगु शुरु जुल धाःसा थ्व सिँ ध्वगिनाः ज्या लगे मजुइगु तकं सम्भावना दु । वहे खँयात ध्यानय् तयाः आः काष्ठमण्डप पुनर्निर्माण समितिं थ्व सिँयात निं सुरक्षित यायेत्यंगु खः ।

मरुसतःया खँ ल्हायेबलय् मेगु स्वयां नं सिँ दकलय् महत्वपूर्ण जुइ । छाय्धाःसां मरुसतः धइगु हे मूलतः सिँयागु सतः खः । उकिं संस्कृतं थुकियात ‘काष्ठमण्डप’ धाल गुगु लिपा अपभ्रंश जुयाः ‘काठमाडौं’ जू वन ।किंवदन्ती ला छु नं दु धायेबलय् मरुसतः धइगु छमा हे सिमाया सिँ छ्यलाः दयेकातःगु संरचना खः ।

उकिं आः पिने अथें लानाच्वंगु सिँ फुक्कं धाथें छमा हे सिमापाखें पिहां वःगु सिँ खइ ला ? संस्कृतिविद् तेजरत्न ताम्राकारया कथं थ्व फुक्क आः छमा हे सिमाया सिँ खइ मखु । छाय्धाःसां मरुसतः थीथी इलय् थीथी कथं जीर्णोद्धार जुइधुंकूगु दु । उकिं मरुसतः दयेकूबलय् धाथें छमा हे सिमाया सिँ छ्यःगु हे खःसां आः उकी मेमेगु जातया सिँ नं ल्वाकज्यायेधुंकूगु दयेमाः ।

ताम्राकारं कनादी कथं आः मरुसतः पुनर्निर्माण याइबलय् थुकी मध्ये छ्यले जिउगु पुलांगु सिँ फुक्क हे छ्यलेगु जुइ । पुरातत्वया सिद्धान्त नं थ्वहे खः । मरुसतःया सिँ परीक्षण जूबलय् उकी सातौं शताब्दीया सिँ नं लुया वःगु खँ पुनर्निर्माण समितिया अध्यक्ष लिसें सांसद राजेश शाक्यं कनादी । उकिं छ्यलेजित्तले पुलांंगु हे सिँ छ्यलेगु जुइ ।

मेगु सिँया लागिं सरकारयात इनाप यानाः जंगलं न्हूगु सिमा पायेकाः हे सिँ हये मालीगु अवस्था दु । थौंकन्हय् पिने अथें लानाच्वंगु थ्व सिँ कन्हय् सुथय् ८ बजेनिसें इन्जिनीयरत वयाः नाप कायेगु व वयां लिपा हनुमानध्वाखा प्रहरी कार्यालय दुथाय् टहरा दयेकाः सुरक्षित यायेयंकेगु ग्वसाः दु । कन्हसंनिसें स्वन्हु तक सिँ ल्ह्ययेगु ज्याझ्वः दुसा ३१ गते पुजा यानाः मरुसतः पुनर्निर्माणया ज्या न्ह्याकीगु ग्वसाः दु ।

सम्बन्धित बुखँ

LEAVE YOUR COMMENTS