प्रम ओलीपाखें आचारसंहिता उल्लंघन

येँ- प्रधानमन्त्री केपी ओलीं राष्ट्रिय सभाया उपनिर्वाचनय् एमालेया उम्मेदवार रामबहादुर थापाया पक्षय् भोट फ्वनेवं निर्वाचन आयोगं प्रमया ध्यानाकर्षण याःगु दु ।

प्रम ओलीं म्हिगः छगू विज्ञप्ति जारी यासें थः उम्मेदवार थापाया पक्षय् मतदान यायेत आह्वान यानादीगु खः । तर निर्वाचन आयोगं चुनावया न्ह्यःने आचार संहिताया अःखः थथे विज्ञप्ति पिकयाः भोट फ्वनेगु पाय्छि मजू धकाः ध्यानाकर्षण याःगु खः ।

आयोगया प्रवक्ता राजकुमार श्रेष्ठं म्हिगः छगू विज्ञप्ति पिकासें आयोगं इनाप यायेक यायेकं छुं मनूतय्सं आचार संहिताया अःखः वक्तव्य बीगु, प्रेस विज्ञप्ति पिकायेगु, प्रकाशन तथा प्रसारण यायेगु व सञ्चार माध्यमतय्सं उम्मेदवार त्याइ बुइ धकाः पूर्वानुमान यानाः सामग्री पिथनेगु पाय्छि मखु धकाः ध्यानाकर्षण याःगु खः ।

बागमति प्रदेशय् जुइगु राष्ट्रियसभा उपनिर्वाचनया निंतिं वंगु जेठ ३ गते १२ बजेनिसें मौन अवधि शुरु जुइधुंकूगु दु । मौन अवधिया दुने उम्मेदवारया पक्षय् मत फ्वनेगु आचार संहिता अःखः खः । ओलीया विज्ञप्ति पिहां वयेवं आयोगं निर्वाचन आचार संहिता अःखः ज्या याइम्ह व्यक्ति वा संस्थायात कानुन बमोजिम कारबाही याये फइगु व उकथं हे आचार संहिता अःखः ज्या याइपिनिगु अभिलेख तयेगु खँ नं जानकारी याःगु खः ।

थौं जुइगु राष्ट्रियसभा उपनिर्वाचनय् एमाले ओली गुटपाखें थापायात उम्मेदवार दयेकातःगु दुसा कांग्रेस, माओवादी केन्द्र, जनता समाजवादी पार्टी व एमालेया माधव नेपाल–झलनाथ गुटपाखें डा. खिमलाल देवकोटायात उम्मेदवार दयेकातःगु दु ।
थ्वहे झ्वलय् विपक्षी पार्टी नेपाली कांग्रेसं आचार संहिता उल्लंघन याःम्ह प्रधानमन्त्री केपी शर्मा ओलीयात कारवाही यायेमाःगु माग याःगु दु ।

सम्बन्धित बुखँ

LEAVE YOUR COMMENTS