बेष्ट फाइनान्सया बेष्ट ज्या

येँ(नेपालभाषा टाइम्स)( बेष्ट फाइनान्स कम्पनी लिमिटेडं थीथी बाजं गुथि, खलःयात आर्थिक ग्वाहालि लःल्हाःगु दु । बेष्ट फाइनान्सं थःपिनिगु सामाजिक उत्तर दायित्वकथं स्वनिगःया झिगू सांस्कृतिक धिमे व धाःबाजं खलःयात आर्थिक ग्वाहालि लःल्हाःगु खः ।

थनया कमलादीइ मूज्याकू दुगु फाइनान्सं थःगु संस्थागत सामाजिक उत्तर दायित्वकथं प्रत्येक बाजं गुथियात न्यय्द्वः तका ल्याखं आर्थिक ग्वाहालि लःल्हाःगु खः । छुं दिं न्ह्यः नेपाल प्रज्ञा प्रतिष्ठानय् छगू ज्याझ्वः यासें गुथिया प्रतिनिधियात उगु आर्थिक ग्वाहालि लःल्हाःगु खः ।

फाइनान्सया प्रमुख लगानी कर्तालसें गैरआवासीय नेपाली संघ (एनआरएनए)या उपाध्यक्ष राजेन्द्रकुमार शर्माया प्रमुख आतिथ्यताय् ज्यापु समाजया नायः तीर्थलाल महर्जन व वरिष्ठ पत्रकार गोपाल गुरागाइँया आतिथ्यताय् उगु आर्थिक ग्वहालि लःल्हाःगु खः ।

ज्याझ्वलय् मचा सांस्कृतिक पुचः (मरुत्वाः), मखं ज्यापु गुथि (मखं), गुरु नित्यनाथ चाबही खलः (चाबही), ज्या दाफा खलः ख्वना (यल), मानन्धर सनाःगू खलः (न्हूसाः,) न्हूसाः ल्याय्म्ह पुचः, राज गणेश धिमे खलः (थिमि), भिंद्यःलाछि टोल सुधार समिति लगंख्यः, (यल) पुसल युथ क्लब तारकेश्वर (येँ) व फय्गं धिमे बाजं खलः (येँ)यात आर्थिक ग्वाहालि लःल्हाःगु खः ।

फाइनान्सया संचालक खिमलाल पौडेलया सभापतित्वय् उगु ज्याझ्वः जूगु खः । लुमंकेबहजू थुगु संस्थापाखें थगुने येँयाःया लसताय् मचा सांस्कृतिक पुचःयात टिशर्त ग्वाहालि कथं लःल्हाःगु खः ।