भीम रावलपाखें सांसद पदं राजीनामा

येँ – नेकपा एमालेया उपाध्यक्ष भीम रावलं सांसद पदं राजीनामा बियादीगु दु । म्हिगः सभामुख अग्निप्रसाद सापकोटायात वय्कलं राजीनामा बियादीगु दु ।

नेपाली कांग्रेसया सभापति शेरबहादुर देउवां धारा ७६ (५) कथं प्रधानमन्त्रीया दावी पेश याःगु इलय् रावल लगायत एमालेया नीखुम्ह सांसदतय्सं समर्थन याःगु खः । तर आः देउवायात प्रधानमन्त्रीया रुपय् विश्वासया मत बीगु इलय् धाःसा मत बी मजिउ धासें वय्कलं राजीनामा बियादीगु खः ।

वय्कःया राजीनामा पती धयातःगु दु, ‘अनैतिक राजनीति लिसें देय् व जनता विरोधी राजनीतिक अध्यासया मतियार जुइगु स्वयां उकिं बिस्कं च्वनेगु हे श्रेयष्कर जूगुलिं प्रतिनिधिसभाया दुजःपाखें राजीनामा बियागु दु ।’

रावलं राजीनामा बी न्ह्यः कार्यदलया दुजःपिं माधव नेपालया छेँय् वनाः झिगू बुँदे सहमतिया आधारय् पार्टी एकता ल्यंकेमाःगु खँ धाःगु खःसा नेपालं उकियात अस्वीकार याःगु खः । रावलया राजीनामा पनेगु निंतिं नेपाल पुचःया नेतातय्सं कुतः याःगु खःसां वय्कलं संसद सचिवालयय् वनाः राजीनामा बियादीगु खः । अन नं वय्कःया राजीनामा पनेगु कुतः जूगु खःसां सफल धाःसा जुइ मफुत । वय्कलं एमालेया उपाध्यक्ष पदं धाःसा राजीनामा बियादीगु मदुनि ।