नेपालभाषा सांगीतिक ख्यलय् मेगु सिरपाः

येँ(नेपालभाषा टाइम्स)- नेपालभाषा सांगीतिक ख्यलय् याकनं हे मेगु छगू सिरपाःया ज्याझ्वः जुइगु जूगु दु । नेवाः साधना कला केन्द्रं छगू पत्रकार सम्मेलन यासें नेपालभाषा सांगीतिक ख्यःया न्यागू विधाय् सिरपाः बीगु जानकारी बिउगु खः । पत्रकार सम्मेलनय् धाः कथं मिजं म्ये हालामि, मिसा म्ये हालामि, म्ये च्वमि, लय चिनामि व बाजं ग्वसाः (म्युजिक एरेन्जर) यानाः न्यागू विधाय् सिरपाः बीगु जुइ । नेपालभाषा सांगीतिक ख्यःयात जक कःघानाः जुइगु सिरपाः ज्याझ्वलय्ृ म्युजिक भिडियोया नं ब्वति दइगु व सिरपाः धाःसा सांगीतिक ख्यलय् जक बीगु खँ नं ग्वसाः खलकं धाःगु दु ।

केन्द्रया नायः सुन्दर श्रेष्ठ (बागमति भाइ)या सभापतित्वय् वय्कलं हे लसकुस यासें न्ह्याःगु ज्याझ्वलय् भाषाह्यमि पौभाः साय्मिं नुगःखँ तयादीगु खः ।

ज्याझ्वलय् वरिष्ठ संगीतज्ञ अमरराज शर्मा, म्ये हालामिपिं जुजुकाजी रंजित, पवित्र कसाःलिसें वरिष्ठ सिने पत्रकार विजयरत्न असंबरे लगायतया उपस्थिति दुगु खः ।