यःमरि पुन्हि व ज्यापु दिवस तःजिक हन

येँ – म्हिगः यःमरि पुन्हिया लसताय् ज्यापु संस्कृति विकास कोषया ग्वसालय् येँय् तःजिक ज्यापु दिवस हन । लगंया माकः गल्लिं बाजागाजा सहित न्ह्याःगु छगू सांस्कृतिक ¥यालीं देय्चाःहिलाः मरुइ थ्यंकाः सभाय् हिउगु खः ।
ज्याझ्वलय् थीथी व्यक्तिपिंत हनेगु लिसें सिरपाः देछायेगु ज्या नं जूगु खः ।

म्हिगः बसन्तपुली न्हिछि धयाथें जूगु ज्याझ्वलय् नेवाः नसात्वँसाया ब्वज्या नं जूगु खः । ज्याझ्वलय् येँ महानगरपालिकाया मेयर विद्यासुन्दर शाक्य लिसे सभासदपिंसं नं सम्बोधन याःगु खः । थ्वहे झ्वलय् नेवाः जातिया तःजिगु नखः यःमरि पुन्हि नं म्हिगः थीथी ज्याझ्वः यासें हन । यःमरि पुन्हिया लसताय् भ्वँतया धनेश्वर महाद्यःथाय् चछि धनेश्वर मेला जुल । नांजाःगु धनेश्वर मेला सुथय् तकं तःजिक न्ह्याःगु खः । धनेश्वर महाद्यः नापं थीथी महाद्यःथाय् नं म्हिगः मेला लगे जूगु खः ।

यःमरि पुन्हिकुन्हु यःमरि नापं छेँ सुचुकुचु यानाः धुकुती यःमरि छायेगु नापं यःमरि द्यःथाय् छायाः यःमरि नयेगु चलन दु । चाकु, दुरुमारी (खुवा) तयाः यःमरि नयेगु नापं तरुं नं तयेगु चलन दु । यःमरि पुन्हिया लसताय् थौं ख्वपया याछेँ त्वालं सनिलय् त्यःछिंत्यः फ्वं वनेगु ज्या जुल । थीथी बाजं थानाः सांस्कृतिक मुँज्या सहित स्थानीय ल्याय्म्हत जानाः यःमरि पुन्हियात निरन्तरता बीगु ल्याखं थुगु ज्याझ्वः जूगु खँ स्थानीय सञ्चारकःमि राजाराम नापितं नेपालभाषा टाइम्सयात कनादिल । नेवाः समाजय् तसकं दुर्लभ थुगु पर्वय् ‘यःमरि माकु, उकिया दुने हाकु बिउसा ल्यासे मबिउगु सितिकुति बुरीकुति’ धइगु म्ये हालाः त्यःछिंत्यः फ्वनेगु ज्या जूगु खः ।

लिसें म्हिगः यःमरि पुन्हि व ज्यापु दिवसया लसताय् लाकाः येँया थीथी त्वाःत्वालय् स्थानीय खलःपुचःत
जानाः यःमरि दयेकाः ब्वयेगु लिसें मीगु ज्या नं जूगु खः ।