ने. सं. ११४३ चौलाथ्व पारू -

जसपा सरकार गठनय् नं तटस्थ जूसा हानं संकट

येँ – जनता समाजवादी पार्टीं प्रधानमन्त्री केपी शर्मा ओलीयात विश्वासया मत मबीगु निर्णय यायेवं देय्या राजनीतिइ न्हूगु मोड वइगु संकेत खने दुगु दु । उगु पार्टीया अध्यक्ष महन्थ ठाकुर व वरिष्ठ नेता राजेन्द्र महतों म्हिगः प्रधानमन्त्री ओलीयात हे नापलासें वय्कःयात विश्वासया मत मबीगु जानकारी यानादीगु खः ।

वय्कःपिंसं म्हिगः वालुवाटारय् प्रम ओलीयात नापलासें विश्वासया मत बिल धाःसा पार्टी तज्याइगु अवस्था वःगु जूगुलिं थःपिं मत व विपक्ष निगुलिं थासय् मवँसे तटस्थ च्वनेगु धकाः जानकारी यानादीगु खः । वय्कःपिंसं थःपिंलिसे सहमति जू कथं सरकारपाखें छुं माग पूरा मयाःगु खँ नं अन न्ह्यथनादीगु खः । लिसलय् प्रम ओलीं अदालतया अनुमति कायेमाःगु जूगुलिं जसपाया माग कथं मुद्दा लित काये लिबाःगु खँ कनादीगु खः ।

एमालेया माधव नेपाल–झलनाथ खनाल पक्षया २० म्ह सांसदतय्सं मंकाः राजीनामा बियाः प्रम ओलीयात अल्पमतय् लाकेगु निर्णय यायेवं जसपाया ओली समर्थक नेतातय्सं नं थःपिनि अडान हीकाः ओलीयात समर्थन मयायेगु निर्णय याःगु खः । प्रमुख प्रतिपक्षी नेपाली कांग्रेस व माओवादी केन्द्रं नं प्रम ओलीयात समर्थन मयायेगु निर्णय याना तयेधुंकूगु दु ।

जसपा दुने संघीय परिषदया अध्यक्ष डा. बाबुराम भट्टराई व मेम्ह अध्यक्ष उपेन्द्र यादवं प्रम ओलीयात समर्थन याये मजिउ धकाः न्हापांनिसें हे अडान कया वयाच्वंगु खःसा पूर्व राजपाया नेतातय्सं धाःसा ओलीयात समर्थन यायेमाःगु बिचाः तया वयाच्वंगु खः । लिपा वयाः जसपा दुने संसदीय दलया नेता ल्ययेगु खँय् मतभेद जुइवं राजेन्द्र महतो नं भट्टराई–यादव क्याम्पय् हे वनीगु संकेत खने दयेवं महन्थ ठाकुर नं बिचाः हिलेत बाध्य जूगु सूत्रया दावी दु ।

जसपाया नेतापिं ठाकुर व महतों म्हिगः हे नेपाली कांग्रेसया सभापति शेरबहादुर देउवायात नं नापलानाः थःपिनि बिचाः न्ह्यब्वयादीगु दु । छुं जुयाः थौं प्रधानमन्त्री केपी ओलीया सरकार क्वःदल धाःसा वयां लिपाया सरकार देउवाया हे नेतृत्वय् गठन जुइगु सहमति जुयाच्वंगु दु । देउवा निवासय् वनाः जसपा नेतातय्सं आःयात प्रम ओलीयात समर्थन मयायेगु जक थःपिनिगु निर्णय खः, सत्ता समीकरणया सवालय् धाःसा आः थथें छुं निर्णय मयानानिगु खँ नं कंगु खः । वय्कःपिसं सत्ता समीकरण थःपिनिगु एजेन्डा मखुगु जुयाः न्ह्याम्हेसिगु सरकार जूसां थःपिनिगु मुद्दायात सुनां समर्थन याइ वयात हे ग्वाहालि यायेगु थःपिनिगु नीति खः धकाः नं धयादीगु खः । छुं जुयाः जसपा सरकार गठनया इलय् नं तटस्थ च्वन धाःसा न्हूगु सरकार गठन यायेत थाकुइफु ।