वरिष्ठ न्यायाधीशतय् इजलास गठन

येँ ÷सर्वोच्च अदालतया ‘फूल कोर्ट’ बैठकं प्रधानन्यायाधीश चोलेन्द्र शम्शेर जबराया प्रस्तावयात अस्वीकृत याःगु दु । शुक्रवाः च्वंगु फूल कोर्ट बैठकय् जबरां सर्वोच्च अदालत (संवैधानिक इजलास सञ्चालन) नियमावली, २०७२ संशोधन यानाः संवैधानिक अदालतय् वरिष्ठ न्यायाधीशत जक च्वनेगु प्रस्ताव याःगु खः । तर फूल कोर्टया न्यायाधीशतय्सं उकियात अस्वीकार याना बिल ।
प्रधानमन्त्री केपी ओलीया सिफारिसय् राष्ट्रपति विद्यादेवी भण्डारीं निक्वःखुसी संसद विघटन विरुद्धया रिटय् वहस यायेत गठन याःगु संवैधानिक अदालतय् विवाद वयेवं प्रधानन्यायाधीश जबरां नियमावली हे संशोधन यानाः वरिष्ठताया आधारय् जक संवैधानिक इजलास गठन यायेगु प्रस्ताव बुधवाःया फूल कोर्टय् तयादीगु खः ।

बैठकय् न्ववाःपिं न्यायाधीशतय्सं रोष्टरय् दुपिं न्यायाधीशतपाखें इजलास गठन यायेबलय् नं वरिष्ठ न्यायाधीशपिं जक तयेत छुं समस्या मदु धासें उकिया लागिं नियमावली संशोधन हे यायेमाःगु आवश्यकता मदुगु सुझाव वय्कःयात बिउगु खः । न्यायाधीशतय्सं थुकियात बाध्यकारी व्यवस्था मयायेत व रोष्टर कथं हे इजलास गठन यायेमाःगु सुझाव नं बिउगु खः ।

थ्व स्वयां न्ह्यः प्रधानन्यायाधीश जबरां सर्वोच्च बारया पदाधिकारीत लिसे भेटवार्ताय् थम्हं नियमावली हे संशोधन यानाः जूसां संवैधानिक इजलासय् वरिष्ठ न्यायाधीशत जक दुथ्याकेगु प्रतिबद्धता प्वंकादीगु खः ।

थ्वहे झ्वलय् प्रधानन्यायाधीश जबरां म्हिगः हे वरिष्ठताया आधारय् संवैधानिक इजलास गठन यानादीगु दु । सर्वोच्च अदालतय् लाःगु नागरिकता अध्यादेश सम्बन्धी मुद्दाया सुनुवाई यायेत वय्कलं इजलास गठन यानादीगु खः ।

म्हिगः प्रधानन्यायाधीश जबरां थःगु अध्यक्षताय् वरिष्ठ न्यायाधीशपिं दीपककुमार कार्की, मीरा खड्का, हरिकृष्ण कार्की व ईश्वरप्रसाद खतिवडा दुथ्याःगु इजलास गठन यानादीगु खः । मेम्ह वरिष्ठ न्यायाधीश विश्वम्भरप्रसाद श्रेष्ठ कोरोना संक्रमित जूगुलिं वय्कः लिपाया वरियताया न्यायाधीश खतिवडायात संवैधानिक इजलासय् दुथ्याकू खः ।

थ्व स्वयां न्ह्यः गठन जूगु संवैधानिक इजलासयात कयाः कानुन व्यवसायीतय्सं न्ह्यसः थंगु खः । इजलासय् दुथ्याःपिं न्यायाधीशपिं तेजबहादुर केसी व बमकुमार श्रेष्ठया खँय् कानुन व्यवसायीतय्सं न्ह्यसः थंगु खः । तर विवादय् लाःपिं न्यायाधीशतय्सं थःपिं इजलासं पिहां मवनेगु अडान कायेवं मेपि निम्ह न्यायाधीशपिं दीपककुमार कार्की व आनन्दमोहन भट्टराईं इजलासय् मच्वनेगु घोषणा याःगु खः ।

झिंछम्ह न्यायाधीश मतयेत निवेदन
थ्वहे झ्वलय् प्रतिनिधिसभा विघटन सम्बन्धी रिटया सुनवाइ याइगु इजलासय् सर्वोच्च अदालतया झिंछम्ह न्यायाधीशत मतयेत माग यासें निवेदन लाःगु दु । अधिवक्ता राजाराम घिमिरें संसद विघटन विरुद्धया रिटय् सुनुवाइ यायेगु झ्वलय् स्वार्थ बाझे जुइगु धासें उगु निवेदन बिउगु खः ।

घिमिरें न्यायाधीशपिं दीपककुमार कार्की, मीरा खड्का, हरिकृष्ण कार्की, विश्वम्भर श्रेष्ठ, ईश्वरप्रसाद खतिवडा, आनन्दमोहन भट्टराई, अनिलकुमार सिन्हा, प्रकाशमान सिंह राउत, सपना मल्ल प्रधान, तेजबहादुर केसी व बमकुमार श्रेष्ठयात इजलासय् मतयेत माग यासें निवेदन बिउगु खः । घिमिरें थ्व स्वयां न्ह्यः सर्वोच्च अदालतय् लाःगु थीथी रिटय् प्रधानमन्त्री केपी ओलीया विपक्षय् व रिट निवेदकया पक्षय् फैसला यायेधुंकूगुलिं वय्कःपिं बाहेक मेपिं न्यायाधीशपिं तयाः इजलास गठन यायेमाःगु माग यानादीगु खः ।

 

सम्बन्धित बुखँ

LEAVE YOUR COMMENTS