किपू ७ वडाया अध्यक्ष माली मन्त

किपू- किपू नगरपालिका ७ वडाया अध्यक्ष राजकुमार माली सोमवाः आकाझाकां मन्त । शनिवाः ब्रेन ह्यामरेज जुयाः अस्पताल यंकूम्ह वय्कः आइतवाः बहनी मदुगु खः । वय्कःया अन्त्येष्टी सोमवाः किपुया भाजंगाः दीपय् जूगु दु । वय्कःया म्ह्याय्पिं श्रृया व सृष्टि माली लिसें अबु जितलाल मालीं सीम्हय् मि तःगु खः ।

अन्त्येष्टी याये न्ह्यः किपू नगरपालिकाया भवन न्ह्यःने अन्तिम श्रद्धाञ्जली देछायेगु निंतिं तःगु खः । वय्कःयात एमाले नेतात झलनाथ खनाल, बामदेव गौतम, अष्टलक्ष्मी शाक्य, कृष्णगोपाल श्रेष्ठ लिसें येँ महानगरपालिकाया मेयर विद्यासुन्दर शाक्य, किपू नगरपालिकाया मेयर रमेश महर्जन, उपमेयर सरस्वती खडका रिजालपिंसं श्रद्धाञ्जली देछायादीगु खः ।

मदुम्ह माली न्हापा ब्याँचुली साँस्कृतिक समाजलिसे आवद्ध जुयाः नेपालभाषाया थीथी ज्याझ्वलय् सक्रिय जुया वयाच्वनादीम्ह खः । लिसें वय्कः किपुया बाघभैरव प्याखं (गथु प्याखं)या गुरु नं खः ।