चिहा संकिपा कासाय् झिगू फिल्म
नेपालभाषा चिहा संकिपा कासाय् झिगू चिहाकःगु फिल्मं धेंधेंबल्लाः याइगु जूगु दु । कासाया निंतिं झिगू चिहाकःगु संकिपा दुहां वःगु खँ नेपालभाषा चिहा संकिपा कासा समितिया दुजः पवित्र कसाःनं कनादीगु दु । कासाय् दुथ्याःगु फिल्मया ल्यज्या सुरु जुइधुंकूगु खँ नं वय्कलं धयादीगु दु ।
कासा उत्कृष्ट फिल्म ल्ययेगु निंतिं निगू चरणय् ल्यज्या जुइगु खँ समितिया हे दुजः सुरेश मानन्धरं धयादीगु दु । कासाया निंतिं नेवाः भाय् संरक्षण सम्बन्धी थीथी प्यंगू विषय बियाः फिल्म दयेकेत आह्वान याःगु खः । उकिं फिल्मया प्राविधिक पक्षयात कयाः व फिल्मया थिमयात कयाः बिस्कं बिस्कं हे क्ववालेज्या जुइगु खँ वय्कलं धयादीगु खः ।
प्राविधिक पक्षय् फिल्मया बाखं÷स्क्रिप्ट, अभिनय, छायाँकन, सः, सम्पादन, निर्देशन व मुक्कं प्रस्तुतियात कयाः फिल्म विज्ञ प्राविधिक÷निर्देशकतय् छगू पुचलं निर्णय बिइसा फिल्मया विषयवस्तुयात कयाः नेपालभाषा ख्यःया न्ह्यलुवाःपिनि छगू निर्णायक पुचलं निर्णय याइगु खँ पवित्र कसाःनं कनादीगु दु ।
कासाया निंतिं ग्वसाःखलकं ‘भाषा म्वाःसा जाति म्वाइ’, ‘झीगु भाय् मन्त धाःसा’, ‘झीगु भाय्, झीगु म्हसीका’ व ‘झीगु भासं च्वये ब्वने मखंसा’ धयागु थिमय् ५ निसें १५ मिनेट तकया फिल्म दयेकेत आह्वान याःगु खः ।
धेंधेंबल्लाखय् कमलरत्न तुलाधरया ‘यांभाय्’, दर्शनवीर शाक्यया ‘द मिथ ०’, पवन जोशीया ‘लिच्वः’, राकेश महर्जनया ‘म्हसीका’, प्रज्वल शाक्यया ‘स्वचेतना’, हर्के माइलाया ‘मांभाय्’, सुनिता राजभण्डारीया ‘हाःसः मदुगु सः’, रामकृष्ण खड्गीया ‘अस्तित्व’, सुरेन्द्र मानन्धरया ‘नेवाः झी नेवाः हे जुइ’ व यादवदास भोछिभोया व विजयेता भोछिभोयाया ‘भकुंग्वारा ख्याः’ दुथ्याःगु खः ।
धेंधेंबल्लाखय् दुथ्याःगु ‘भकुंग्वारा ख्याः’ पोखरां दयेकाहःगु फिल्म खःसा मेगु फुक्क स्वनिगलय् हे दयेकूगु फिल्म खः । चिहाः संकिपा कासाय् न्हाप लाःगु फिल्मयात ७५ हजार तका सिरपाः बीसा लिउ लाःगु फिल्मयात ५० हजार तका सिरपाः बी, अथेहे हःपाः कथं निगू फिल्मयात २५–२५ हजार तका सिरपाः बी ।
चिहा संकिपा कासाया ग्वसाः पुचलय् पवित्र, सुरेश लिसें सुमन श्रेष्ठ व अमेरिका पाखें प्रवीण श्रेष्ठ दुथ्याः । कासाय् दुथ्याःगु संकिपाया प्रिमियर शो यायेधुंकाः उत्कृष्ट फिल्मया घोषणा यायेगु खँ ग्वसाःपुचःया दुजः पवित्र कसाःनं धयादीगु दु ।
LEAVE YOUR COMMENTS