हलिं नेवाः दिवसय् थीथी ख्यःयापिंत हनेज्या

येँ(नेपालाभाषा टाइम्स)- वल्र्ड नेवाः अर्गनाइजेसन (डब्लुएओ)पाखें दँयदसं मार्च महिनाया दकलय् लिपांगु शनिवाः ‘हलिं नेवाः दिं’ अर्थात विश्व नेवाः दिवस हना वयाच्वंगु दु । थ्व झ्वलय् थुगुसी नं विश्वन्यंकं च्वंपिं नेवाःतय्सं थःथःगुकथं थीथी ज्याझ्वः यासें थ्व दिवस वंगु शनिवाः हन ।

थुगुसी न्हय्क्वःखुसी थ्व दिवस हंगु खः । थुगुसी न्हय्क्वःगु विश्व नेवाः दिवसया लसताय् हलिं नेवाः दबू नेपाः देय् मूकवःपाखें यल लाय्कूस्थित केशवनारायण चोकय् विशेष ज्याझ्वः याःगु दु । ज्याझ्वलय् भाषा, कला, साहित्य, संस्कृतिया निंतिं थःथःगु थासं योगदान बियादीपिं थीथी ख्यःया व्यक्तित्वपिंत हनेज्या याःगु खः ।

ज्याझ्वलय् वरिष्ठ भाषासेवी राजा शाक्य, वरिष्ठ च्वमिलिसें शिक्षाविद् समाजसेवी प्रा. सुवर्ण शाक्य, वरिष्ठ कलाकार किरण मानन्धर, कासामि महेश्वर महर्जन, नेपालय् न्हापांखुसी जँलास्येँया सफल प्रत्यारोपण यानादीम्ह चिकित्कस डा. पुकारचन्द्र श्रेष्ठ, मिसा उद्यमी सुसन कर्माचार्य, पर्यटन ख्यःया अजय स्थापितयात हनेज्या याःगु खः ।

अथे हे इतिहाविद्लिसें च्वमि योगेन्द्रमान श्रेष्ठ, कलाकारलिसें निर्देशक पवन जोशी, समाजसेवी निलकाजी शाक्य, वरिष्ठ पत्रकारलिसें नेपालभाषा टाइम्स न्हिपौया सम्पादक सुरेश किरण मानन्धर, नेपाः पासा पुचः अमेरिकाय्, झी पुचः विराटनगर व पुलांम्ह मन्त्रीलिसें पूर्व प्रहरी महानिरीक्षक ध्रुवबहादुर प्रधानयात हनेज्या याःगु खः ।
नांजाःम्ह ख्यालिजुजु मदनकृष्ण श्रेष्ठ मूपाहांकथं झायादीगु ज्याझ्वः नेपाः कवःया नायः सुरेन्द्रभक्त श्रेष्ठया सभापतित्वय् जूगु खःसा कामु छ्याञ्जे कस्तुरी श्रेष्ठं लसकुस यानादीगु खः ।

उगु इलय् विश्व नेवाः दिवसयात कयाः लोककवि राजभाई जकःमिं च्वयादीगु व जुगल डंगोलं लसय् हनादीगु विश्व नेवाः म्येँया नं पितब्वज्या याःगु खःसा डब्लुएनओया संरक्षक दयारत्न शाक्यं च्वयादीगु ‘नेवारलोजी मेट्रेस नांया भाषा विज्ञान सफू नं पितब्वज्या याःगु खः ।