यन्त्रकलाया नेवाः पहया कासा राजमति मालेनु

येँ – नेवाः ख्यलय् थीथीकथंया मल्टिमिडिया सामग्रीत दयेका वयाच्वंगु यन्त्रकलां लिपांगु इलय् छगू न्हूकथंया कासा हःगु दु । प्रविधिया विकासलिसें न्हूकथंया आपालं कासात वयाच्वंगु इलय् यन्त्रकलां लिपांगु इलय् ‘राजमति मालेनु’ धइगु कासा पितहःगु दु ।

थुगु कासा नकतिकि क्वचाःगु प्यक्वःगु हलिं नेवाः दिंया लसताय् लाकाः उलेज्या याःगु खः । थुगु कासाया उलेज्या पासा पुचः गुथि युकेया नायः मय्जु रुक्मणि मानन्धरं यानादीगु खः । उगु इलय् नेवाः शोधकर्ता ठाकुरलाल मानन्धरं मुंकादीगु राजमतिया लोकम्येँ वय्कःया काय शशिधर मानन्धरं ब्वनाः न्यंकादीगु खः ।

नेवाः पहःया ‘राजमति मालेनु’ कासा नेपालभाषा व खस भासं म्हितेगु न्हापांगु कम्प्युटर कासा जूगु यन्त्रकलां न्ह्यथंगु दु । गुगुं नं इन्टरनेट ब्राउजरय् अनलाइनमाध्यमं डेक्सटप, ल्यापटप, ट्याब्लेट, एन्ड्रोइड, आइफोनय् म्हिते जिउगु थ्व कासा छम्ह मिसाया चरित्रया लिधंसाय् दयेकातःगु विश्वया हे म्हो कासामध्ये छगू जूगु यन्त्रकलाया दावी दु ।

थौंकन्हय् अनलाइन प्रविधियामाध्यमं म्हितीगु थीथी कासा थें थुगु कासाय् नं राजमति नाप लायेत वा मालेत थीथीकथंया हाथ्या वा चरण पार याना वनेमाः । यन्त्रकलां बिउगु जानकारीकथं थुगु कासा म्हितेबलय् राजमति मालेत रञ्जना लिपि ब्वनेकुथि, पासा छेँ, रेष्टुराँ, संकिपा छेँ, जात्रा थेंज्याःगु थीथी चरण पार यायेमाः । अथे हे थीथीकथंया न्ह्यसःया पाय्छि लिसः बियाः राजमतिं तंकूगु थीथी तिसाज्वलं नं मुंकेमाः । थ्व कासाय् झिंनिगू चरण दुगु व थीथी क्वथाय् निता निता तिसाज्वलं लुइकाः राजमति नाप लायेगु थाय्या छगः छगः आखः नं लुइकेमाः । अनंलि राजमति नाप लायेगु थासय् तक थ्यंके धुंकाः थीथीकथंया तिसाज्वलंयात इमिगु नांलिसे ज्वःलाकेमाः ।

थुगु कासा न्ह्यइपुकेया निंतिं म्हितेगु जक मखसे कासा म्हिते सिधल धाःसा पासा पुचः गुथि युकेपाखें प्रत्येक चरणय् छपाः डिजिटल हनापौ नं लःल्हाइ । थ्व कासा म्हितेबलय् कासामिपिं छगू क्वथां मेगु क्वथाय् वने जिउसा गुगुं क्वथाय् तप्यंक वने नं जिउ ।

थुगु कासां नेवाः तिसाज्वलं, छेँज्वलं, नेवाः लिपि, नसात्वँसा, जात्रा, संकिपा, थाय्बाय्या बारे जानकारी बीत ग्वाहालि याइगु थुकिया निर्माता यन्त्रकलाया धापू दु । लिपांगु इलय् स्वनिगःया थीथी स्थानीय निकायं थःथःगु लागाय् स्थानीय पाठ्यक्रमया रुपय् अनिवार्य नेपालभाषा विषय ब्वंका हयाच्वंगु इलय् थुगु कासां नं नेवाः भाय्, समाज व तजिलजिया बारे नं जानकारी कायेत ग्वाहालि याइगु संस्थां न्ह्यथंगु दु ।
थुगु कासा सार्वजनिक यायेगु ज्याझ्वलय् पीपीजीयुकेया संस्थापक अमृत स्थापित, पुलांपिं नायःपिं कृष्ण चखुं, डा. सचेतन तुलाधर, संयुक्त श्रेष्ठ, वल्र्ड नेवाः अर्गनाइजेसनया पुलांम्ह नायः डा. बालगोपाल श्रेष्ठ, पुलांम्ह मूछ्याञ्जे सुभाषराम प्रजापति लगायतं ब्वति कयादीगु खः ।

 

सम्बन्धित बुखँ

LEAVE YOUR COMMENTS