हाकनं थरुहट आन्दोलनया तयारी

येँ – थारु कल्याणकारिणी सभां टीकापुर आन्दोलनया घटनाय् रेशम चौधरीया लिसें जन्म कैद न्यंकूपिं झिंछम्हेसिया बारे सरकारं पुनर्बिचार मयात धाःसा कडा आन्दोनलय् कुहां वयेगु ख्याच्वः बिउगु दु । जिल्ला कार्यसमिति बाँकेया ग्वसालय् कोहलपुरय् जूगु बृहत भेलां उगु ख्याच्वः बिउगु खः । थारु कल्याणकारिणी सभा बाँकेया अध्यक्ष विनोद थारुया संयोजकत्वय् जूगु बृहत भेलां त्वाःत्वालय् मोर्चा गठन यानाः आन्दोलन यायेगु ख्याच्वः बिउगु खः ।

भेलां टीकापुर घटनायात कयाः पुलांम्ह न्यायाधीश गिरीशचन्द्र लालया संयोजकत्वय् तयार याःगु प्रतिवेदन नं तत्काल सार्वजनिक यायेत माग याःगु दु ।

थारु कल्याणकारिणी सभां थ्वहे वइगु चैत १६ गते देय्न्यकंया थारुतय् भेला यायेगु व चैत १७ गते निसें चरणबद्ध आन्दोलनया यायेगु तयारी यानाच्वंगु जानकारी नं अध्यक्ष थारुं बियादीगु दु ।