ने. सं. ११४३ चौलाथ्व पारू -

जनगायक भृगुराम श्रेष्ठया याकः सांगीतिक ज्याझ्वः जुइगु

येँ – नेपालभाषाया अतिकं नांजाःम्ह म्येँ हालामि, जनगायक भृगुराम श्रेष्ठया याकः सांगीतिक ज्याझ्वः जुइगु जूगु दु । जयश्री संगीत समाजया ग्वसालय् थ्व हे वइगु चैत १८ गते आइतवाः कुन्हु थनया राष्ट्रिय नाचघरय् उगु ज्याझ्वः जुइ । झी कलाकार उपाधिपाखें तकं सम्मानित जुयादीम्ह म्येँ हालामि श्रेष्ठया सम्मानय् समाजं उगु ज्याझ्वः यायेत्यनागु छगू पत्रकार सम्मेलन यासें जानकारी बिउगु दु । पत्रकार सम्मेलनय् समाजया महासचिव रमेश डंगोलं लसकुस यासें ज्याझ्वःया बारे जानकारी बियादीगु खःसा नायः लक्ष्मीप्रसाद डंगोलं ज्याझ्वःया उद्देश्ययात कयाः नुगःखँ प्वंकेगु झ्वलय् समाजपाखें अन्तर्राष्ट्रिस्तरय् नांजाःपिं थीथी व्यक्तित्वपिंत ब्वनाः सांगीतिक ज्याझ्वः यायेधुंगु व थुगुुसी नेवाः ख्यःया नांजाःम्ह म्येँ हालामि श्रेष्ठया याकः सांगीतिक ज्याझ्वः यायेत्यनागु जानकारी बियादीगु खः ।
२०६८ सालय् नीस्वंगु नेपाःया तबलावादक कलाकातय् उगु संस्थां शास्त्रीय लोकसंगीतया क्षेत्रय् थीथी ज्याझ्वः याना वनेगु ग्वसाःकथं दकलय् न्हापां नेपाःया नांजाःम्ह सरोदवादक मोहनसुन्दर श्रेष्ठ व सुरेशराज वज्राचार्यया जुगलबन्दी ज्याझ्वः याःगु खः । वयां लिपा उमा थापा व जापानी सितारवादक सुजेरो ताकानाया सितारवादन ज्याझ्वः याःगु खः ।

अथे हे भारतया पद्मभूषण उपाधिं सम्मानित अन्तर्राष्ट्रियस्तरय् नांजाःम्ह बासुरि वादक पं. हरिप्रसाद चौरसियाया सांगीतिक ज्याझ्वः लिपा भुटानया अतिकं नांजाःम्ह म्येँ हालामि मधुकर लोहनीया सांगीतिक प्रस्तुति व भारतया नांजाःम्ह व वरिष्ठ कत्थक नृत्यांगना शिखा खरे व नेपाःया नांजाःम्ह कत्थक नृत्यांगना सुविना श्रेष्ठया कत्थक ज्याझ्वःया याये धुंगु पत्रकार सम्मेलनय् जानकारी बिउगु खः । दँय्दसं अन्तर्राष्ट्रियस्तरय् नांजाःपिं शास्त्रीय लोकसंगीतया ख्यलय् विशिष्ट योगदान बियादीपिं कलाकारतय्त ब्वनाः ज्याझ्वः याना वयाच्वंगु संस्थां थुगुसी नेपालभाषा ख्यःया नांजाःम्ह म्येँहालामि श्रेष्ठया याकः सांगीतिक ज्याझ्वः यायेत्यंगु खः । पत्रकार सम्मेलनय् नवासें दबुलिइ यक्व दने धुंगु खःसां थुकथं थःगु सम्मानय् याकः सांगीतिक ज्याझ्वः यायेगु ग्वसाः खलःया इनापयात थम्हं अस्वीकार याये मफुगु ८५ दँ दयेधुंकूम्ह जनगायक श्रेष्ठं कनादिल ।लिसें वय्कलं थुगु ज्याझ्वः थःगु सम्मानया निंतिं मखसे थःत म्हसीका बिउगु, थःत न्ह्यःने हःगु, थःत आपालं खँ बिउगु थ्व समाजंयात ग्वाहालि व सम्मान यायेगु हे ल्याखं थ्व ज्या जुइत्यंगु खः धयादिल । अथे हे वय्कलं थ्व समाजयात गबलें नं त्वःताः वने मफइगुनापं अलग नं च्वने फइमखु धयादिल । ज्याझ्वलय् जनगायक श्रेष्ठं थःगु अतिकं लोकंह्वाःगु भाषिक जागरण, मतिना, धार्मिक यानाः झिंनिपु म्येँ न्ह्यब्वयेगु व उकी निपू म्येँय् रत्नशोभा महर्जनं थःत साथ बीगु नं जानकारी बिउगु खः । समाजपाखें निलाय् छकः न्हापांगु शनिवाःकुन्हु शास्त्रीय लोकसंगीतया जुगलबन्दी ज्याझ्वः नं याना वयाच्वंगु दु ।