ने. सं. ११४४ कौलाथ्व पारू - नःलास्वनेगु

आः लाइसेन्सया फाराम न्हूगु हे कथं

येँ- सवारी चालक अनुमति पत्र (लाइसेन्स) या नितिं थ्व स्वयां न्ह्यः भरे याःगु आवेदन रद्द जूगु दु । यातायात व्यवस्था विभागं म्हिगः परीक्षा मबिउपिनिगु आवेदन रद्द यानाः न्हूगु आवेदन चायेकेत्यनागु खँ धाःगु दु ।

म्हिगः बहनी ६ बजे लिपा लाइसेन्सया नितिं अनलाइनपाखें आवेदन भरे यायेफइगु खँ महानिर्देशक नमराज घिमिरें कनादीगु दु । वर्ग थप यायेमाःपिंत मेगु सोमवाःनिसे आवेदन चायेकेगु खँ धाःगु । आः गुगु कार्यालयय् गुलि कोटा दु धइगु जानकारी अनलाइनय् हे काये फइ ।

अनलाइन फाइन भरे याःगु झिंन्यान्हुया दुने सःताः परीक्षा कायेगु व्यवस्था याःगु दु । थ्व स्वयां न्ह्यः छम्ह हे व्यक्तिं निगू स्वयां अप्वः फारम जायेकूगुलिं लिपा लाःपिंसं परीक्षाया नितिं ताः ई पीमाःगु अवस्था दुगु खःसा आः अथे पीम्वाःलीगु खँ धाःगु दु ।

गुकथं भरे यायेगु आवेदन ?
आवेदन भरे यायेत दकलय् न्हापां एप्लाईडीएल डट् डीओटीएम डट जीओभी डट एनपीइ वनाः युजर आइडी व पासवर्ड थम्हं दयेकेमाः । न्हापा थें तप्यंक फारम भरे याये दइ मखु । युजर आइडी व पासवर्ड थम्हं दयेकेधुंकाः फाराम लगइन यानाः न्हापा थें स्वंगू पुस्ता विवरण भरे यायेमाः । अथे हे फारमया शुल्क भुक्तानी नं अनलाइनपाखें यायेफइ ।

फारम भरे यानाः दकलय् लिपा ‘पेमेन्ट’ क्लिन यायेधुंकाः कनेक्ट आईपीएसपाखें ध्यबा भुक्तानी यायेफइ । मखुसा अनलाइनं भौचर दयेकाः उकियात प्रिन्ट यानाः बैंकय् यंकाः ध्यबा पुले फइ । बैंकय् वनाः आः थें भौचर जायेकाः आवेदन बीफइ । फारम बुझे यायेधुंकाः शारीरिक परीक्षण व फोटो कायेगु नितिं आवेदनय् छनोट जूगु ज्याकुथीं सःती । शारीरिक परीक्षण व फोटो खिचे यायेधुंकाः जक लिखित
परीक्षा जुइ, लिखित परीक्षाया मेगु न्हि कुन्हु ट्रायल जुइ ।