नारायण विलास प्रतिष्ठानया साधारणसभा

थिमि – नेपाल कम्युनिष्ट पार्टीया संस्थापक सदस्य सचिव नारायणविलास जोशी स्मृति प्रतिष्ठानया न्याक्वःगु साधारणसभा जुल । प्रतिष्ठानया अध्यक्ष राजेन्द्रमान श्रेष्ठया सभापतित्वय् जूगु सभाय् सचिव महेन्द्रगोपाल कर्माचार्यं वार्षिक प्रगति प्रतिवेदन न्ह्यब्वयादिसें कोरोना भाइरस संक्रमणया कारणं थुगुसी आपालं ज्याझ्वः याये मफुसां भवन निर्माण यायेगु महत्वपूर्ण ज्या ९० प्रतिशत सम्पन्न जुइधुंकूगु जानकारी बियादीगु खः ।

कोषाध्यक्ष सुशिला सुवेदीं आर्थिक प्रतिवेदन न्ह्यब्वयादिसें भवन निर्माणया निंतिं प्रदेश सांसद कोषपाखें व थीथी निकायपाखें प्राप्त ग्वाहालि बारे जानकारी बियादीगु खः । वय्कलं सांसद कोषपाखें ९१ गू लख स्वीद्वः तकामध्ये २७ गू लख तका जक प्राप्त जूगु व मध्यपुर थिमि नगरपालिकाय् वयेधुंकूगु बजेट नं प्राविधिक कारणं लिहां वःगु सभाय् जानकारी बियादीगु खः ।

सभां प्रतिष्ठानया न्हूगु ज्यासना पुचः नं ल्यःगु खः । डा. राजेन्द्रमान श्रेष्ठया हे अध्यक्षताय् झिंछम्हेसिया न्हूगु ज्यासना पुचः ल्यःगु खः । न्हूगु ज्यासना पुचलय् उपाध्यक्ष रामसुन्दर हाडा, सचिव महेन्द्रगोपाल कर्माचार्य, कोषाध्यक्ष सुशिला सुवेदी व दुजलय् श्यामकृष्ण कोजु, कृष्णसुन्दर घो, शिवहरी प्रधानांग, अर्जुन बस्नेत, कृष्णलाल गोजा श्रेष्ठ, अनिता श्रेष्ठ व पुण्य रंजित च्वनादीगु दु ।