आर्मी व संकटा बराबरीइ

येँ – शहीद स्मारक ए डिभिजन लिगया म्हिगः जूगु कासाय् त्रिभुवन आर्मी क्लब व संकटा क्लबं बराबरीया कासा म्हितूगु दु। दशरथ रंगशालाय् जूगु कासाय् निगुलिं टिमं छगू छगू गोल यायेवं कासा बराबरीइ क्वचाःगु खः ।

कासाया न्हापांगु हाफय् नवयुग श्रेष्ठया गोलय् आर्मीं अग्रता काःगु खःसां लिपांगु हाफय् झिम्हय् सीमित जुइवं आर्मीं थःगु अग्रता कायम यानातये मफुगु खः । कासाया ५२ औं मिनेटय् युद्ध शाही निगू म्हासुगु कार्ड नयाः मैदानं पिहां वनेमालेवं आर्मी झिम्हय् सीमित जूगु खः । थ्वयां न्ह्यव न्हापांगु हाफया २९ औं मिनेटय् नवयुगं हेडपाखें याःगु गोलया ग्वाहालिं आर्मीं अग्रता काःगु खः । तर झिम्हय् सीमित जुइवं दबाबय् लाःगु आर्मीं कासाया ५५ औं मिनेटय् गोल नयेमाःगु खः ।

पेनाल्टि बक्सय् सुमन अर्यालं ह्याण्ड यायेवं संकटायात पेनाल्टिया ह्वःताः चूलाःगु खः । अमित तामाङं पेनाल्टिपाखें बराबरीया गोल याःगु खः । थ्व बराबरीं आर्मीया लिगय् शीर्षस्थानय् वनेगु ह्वःताः छखे लाःगु खः । आः मच्छिन्द्र व आर्मीया समान १३-१३ अंकं जूगु दु। थुपिं लिपा मनाङ मस्र्याङ्दीया १२ व थ्रीस्टारया १० अंक दु। थ्व कासा लिसें शहीद स्मारक लिगया खुगूगु चरणया कासा क्वचाःगु दु ।