सतक विस्तार फैसलाया पुनरावलोकन तयारी

येँ – सडक विस्तार पीडिततय्सं तःगु मुद्दाया पूर्ण पाठ वयेधुंकाः सरकारं उकियात कयाः न्यायिक पुनरावलोकन यायेगु धकाः न्ह्याकाच्वंगु तयारी अन्तिमय चरणय् थ्यंगु खँ सीदुगु दु । वंगु असोज २ गते जूगु फैसलाया पूर्णपाठ वंगु असार १४ गते जक तयार जूगु खः । पूर्ण इजलासं याःगु फैसला कथं थुनेमाःगु छेँयात मुआब्जा बी माल धाःसा सरकारयात ५० अर्ब तका नोक्सानी जुइ धासें सरकारं फैसला पुनवरालोकन यायेत्यंगु खः ।

पूर्णपाठय् जग्गा प्राप्ति ऐन २०३४ कथं सडक विस्तार यायेत आदेश बियातःगु खःसा थुकिं यानाः सरकारयात थप व्ययभार लाइगु खँ धाःगु दु । विकास निर्माणया ज्याय् सर्वोच्चं ग्वाहालि मयाःगु निष्कर्षय् सरकार थ्यंगु धासें पुनरावलोकनपाखें मुद्दायात हीकेगु खँ भौतिक पूर्वाधार तथा यातायात मन्त्री रघुवीर महासेठं कनादीगु दु ।

वय्कलं धयादी, ‘जिमिसं अदालतया फैसलायात उच्च सम्मान याना, उगु फैसला कार्यान्वयनं न विकास निर्माणया ज्यां गति काइ, न राज्यया धुकू हे बल्लाइ, उकिं पुनरावलोकनय् वनेमाःगु खः ।’वय्कलं न्यायिक पुनरावलोकनया निंतिं माःगु प्रक्रिया, आधार व प्रमाण तकं चूलाके धुंकूगु खँ कनादिल ।

भौतिक पूर्वाधार मन्त्रालयं हे पुनरावलोकनया निवेदन तयार यानाच्वंगु दु । मन्त्रालयं शहरी विकास मन्त्रालय, गृह मन्त्रालय लिसे समन्वय यानाः तयार याःगु पुनरावलोकन निवेदन महान्यायधिवक्ताया ज्याकूपाखें सर्वोच्चय् दर्ता जुइ ।उखे सडक विस्तार पीडित जनतां सरकारं यानाच्वंगु थ्व तयारीया विरोध याःगु दु ।