स्वनिगःया स्कूल प्यन्हु बन्द, वा वयेवं चिला वनी स्वनिगःया खसु

येँ- स्वनिगलय् वंगु छुं न्हि न्ह्यवंनिसें आकाझाकां खने दया वःगु खसु अझ छुं न्हि ल्यनाच्वनीगु खँ धाःगु दु । छसुया मू कारण जंगलय् च्यानाच्वंगु बुलुमि खः धाःगु दु । मौसमविद् प्रतिभा मानन्धरं कनादीकथं वंगु छुं ई न्ह्यवंनिसें नेपाः व भारतया आपालं जंगलय् मि च्यानाच्वंगु कारणं प्रदूषणया कण वायुमण्डलय् मुनाच्वंगुलिं आपालं थासय् खसु कुहां वःगु खः ।
आः खने दुगु थ्व खसु चिला वनेगु लागिं तसकं फय् वयाः वा नं वये मानि । वयां लिपा जक मौसम सफा जुइगु खँ वय्कलं कनादीगु दु ।

मौसमविद् मानन्धरया कथं थौं न्हिनय्–पाखे पश्चिमी वायु सक्रिय जुइगु सम्भावना खने दयाच्वंगु दु । थुकिं यानाः तसकं फय् वइगु खनेदु । नापं वा नं वल धाःसा मौसम सफा जुइगु सम्भावना दु ।
विभागं धाः कथं म्हिगःनिसें देशय् स्थानीय वायु नापनापं पश्चिमी वायुया समेत छुं भचा प्रभाव खने दयाच्वंगु दु । न्हिनय्पाखे बागमती प्रदेशय् भचा वा वयाः पहाडी लागाय् नँ न्यानाः वा नं वइगु सम्भावना दु ।

म्हिगः स्वनिगःया न्यूनतम तापक्रम १०.८ डिग्री व अधिकतम तापक्रम २४.८ डिग्री सेल्सियस दुगु खः । म्हिगः येँय् छुं भचा ख्वाउँगु नं महसुस याना हःगु खः । मौसम तसकं स्यनावंगुलिं विद्यार्थीतय् स्वास्थ्यय् लिच्वः लायेफु धकाः सरकारं थनिंनिसें प्यन्हु तक स्कुल व क्याम्पस बन्द याःगु दु ।