तार व्यवस्थापन यायेत निर्देशन

ख्वप – ख्वप नगरय् केबुल व इन्टरनेट सेवा प्रदायक कम्पनीतय्सं लाक्वपाक्व व अव्यवस्थित रुपं तयातःगु तारया व्यवस्थापन याइगु जूगु दु ।जिल्ला प्रशासन ज्याकुथिइ प्रजिअ नारायण भट्टया अध्यक्षताय् सरोकारलावातय् दथुइ जूगु सहलह मुँज्यां नगर न्यंकं तयातःगु तार व्यवस्थापन यायेगु निर्णय याःगु खः ।

सतकन्यंकं लाक्वपाक्व तयातःगु तारं दुर्घटना अप्वःगु व सहरीया सुन्दरताय् नं लिच्वः लाःगु धासें अज्याःगु तार व्यवस्थापन यायेगु निर्णय बैठकं याःगु खः । केबुल व इन्टरनेट सेवा प्रदायक कम्पनीं झिंन्यान्हुया दुने तार व्यवस्थापन मयात धाःसा कारवाही याइगु जूगु दु । प्रजिअ भट्टं गुगुं नं त्वह तयाः तार व्यवस्थापन यायेगुपाखें लिचिले दइमखु धासें बाःछिया दुने दक्वं तार व्यवस्थापन यायेत निर्देशन बियादीगु खः ।

वय्कलं निर्देशनयात बेवास्ता यात धाःसा कारवाही यायेगु ख्याच्वः नं बियादीगु खः । वय्कलं निर्देशनयात बेवास्ता यात धाःसा कारवाही नं याना वनेगु व अव्यवस्थित तार दक्वं चानाः व्यवस्थापन यायेगु जुइ धासें थ्वपाखें जुइगु असुविधाप्रति सरोकारवाला स्वयं हे जिम्मा कायेमालीगु धयादिल ।

निजी कम्पनीतय्सं थःत नक छिंक व लाक्वपाक्व धंगं तार तयेगु याइगुलिं सवारी साधनलिसें सर्वसाधारणयात तकं सास्ति जुइगु तर उकिया द्वपं धाःसा सरकारयात बीगु प्रवृत्ति अप्वया वनाच्वंगुलिं अज्याःगु तार व्यवस्थापन यायेत निर्देशन बियागु प्रजिअ भट्टं कनादिल ।

सहलह मुँज्याय् सूर्यविनायक नगरपालिकाया उपप्रमुख जुना बस्नेतं थाय्थासय् सतकया दथुइ च्वंगु मतया लठ्ठा व टेलिकमया थांयात व्यवस्थापन यायेगु ज्या मजूगुलिं नं समस्या वयाच्वंगु धासें उकिया व्यवस्थापनय् समन्वय यानाबीत प्रजिअयात इनाप यानादिल ।

सम्बन्धित बुखँ

LEAVE YOUR COMMENTS