कोरोनां स्वास्थ्यकर्मी सित धाःसा १० लाख

यल – यलया गोदावरी नगरपालिकां थःगु नगर क्षेत्र दुने कोरोना प्रभावित मनूतय् सेवा यायां यदि सुं स्वास्थ्यकर्मी वा कर्मचारी कोरोना ल्वचं कयाः मन्त धाःसा वया छेँजःयात १० लाख तका क्षतिपूर्ति बीगु निर्णय याःगु दु ।

अथे हे नगर क्षेत्रय् कोरोना प्रभावितपिनि सेवा यायां सुं स्वास्थ्यकर्मी वा कर्मचारी विरामी जुल धाःसा वयागु सम्पूर्ण उपचार खर्च नगरपालिकां व्यहोरे यायेगु निर्णय नं याःगु दु । गोदावरी नगरपालिकाया मेयर गजेन्द्र महर्जनं नगरपालिकापाखें याःगु थ्व निर्णयया जानकारी सार्वजनिक यानादीगु खः ।

अथे हे नगरयात कोरोनामुक्त यायेगु लागिं आवश्यक ज्या यायेत विपद् व्यवस्थापन कोषपाखें प्रति वडा २ लाख तका दां विनियोजन यानागु जानकारी नं वय्कलं बियादीगु दु । लकडाउन अवधि दुने नगरया सुं मनूयात छुं नं कथं अस्पताल यंकेमाःगु अवस्था जुल धाःसा एम्बुलेन्स सेवा निःशुल्क यायेगु निर्णय नं नगरपालिकां याःगु दु ।

(ने. सं. ११४० चौलाथ्व ४ / वि. सं २०७६ चैत १५, शनिवाः)