नेपालय् कोरोनाया कारणं हानं मेम्ह सित, सीपिं २म्ह थ्यन

येँ – नेपालय् हानं छम्ह मनू कोरोना भाइरसाया कारणं सीगु दु । बाँकया नरैनापुरया दीपेन्द्र माविया क्वारेन्टाइनय् दुम्ह २५दँया मनू सीगु पुष्टि स्वास्थ्य तथा जनसंख्या मन्त्रालयं याःगु दु ।

वैशाख ३० गते भारतं नेपाः लिहांवयाः क्वारेन्टाइनय् च्वनाच्वम्ह उम्ह मनूयात सासः ल्हायेत थाकुयाच्वंगु खः । क्वारेन्टाइनय् हे अस्वस्थ्य जुम्ह मनू आइतवाः सुथय् मदुगु खः । मदयेधुंकाः कोरोना परीक्षण यायेगु निंतिं स्वाब संकलन याःगु खः । परीक्षणया झ्वलय् रिपोर्ट पोजेटिभ वःगु खँ मन्त्रालयया प्रवक्ता डा. विकास देवकोटां कनादिल ।

धुलिखेल अस्पतालय् सीम्ह मिसा नं कोरोना संक्रमित जूगु पुष्टि म्हिग जक जूगु खः । थ्व नापं नेपालय् कोरोनाया कारणं सीपिं २म्ह थ्यंगु दु ।