ने. सं. ११४६ अनलाथ्व पुन्हि -

किपुली जुलुस पिकाःपिं विरुद्ध प्रहरीइ निवेदन

किपू – लकडाउनया इलय् किपुली जुलुस पिकाःगु धासें जुलुसय् सहभागी विद्यार्थीतय्त कारवाहीया मागयासें प्रहरीं निवेदन बिउगु दु । मनूत मुने तकं मदुगु लकडाउनया इलय् लकडाउनयात उल्लंघन यासें जुलुस पिकाःगु धासें कारवाही माग यासें किपूया स्थानीयतसें महानगरीय प्रहरी वृत्त किपुली निवेदन तःगु खः ।

निवेदन तयेगु निंतिं निसलं मल्याक स्थानीयवासीत किपूया प्रहरी वृत्तय् मुंगु खः । स्थानीयतसें प्रहरी वृत्तया प्रमुख डिएसपी छेदीलाल कामतयात निवेदन लःल्हाःगु खः ।

थौं न्हिनय् त्रिविया विद्यार्थीपिंसं राहत इनाच्वंपिं विद्यार्थीया सुरक्षा यायेमाःगु, विद्यार्थीतय्त नयेत्वनेगु व्यवस्था यायेमाःगु धयागु माग यासें जुलुस पिकाःगु खः । २५–३० म्ह विद्यार्थीत मुनाः जुलुस पिकाःगु झ्वलय् स्थानीयत लिसे छझाः झडप नं जूगु खः । झडपय् लानाः घाःपाः जूम्ह छम्ह विद्यार्थीयात अस्पताल यंकूगु खँ दु । झडप लिपा प्रहरीं निम्ह विद्यार्थीतय्त नं ज्वनातःगु दु ।

जुलसय् वःपिं विद्यार्थीतय्सं त्रिविया विद्यार्थीतय्त राहत बीमाःगु धासें किपूवासी व किपू नगरपालिकाया विरुद्ध नारा लगे यानावःगुलिं स्थानीयत तम्वःगु खँ धाःगु दु । विद्यार्थी नेता हेमराज थापाया क्वथां म्हिगः बरामद याःगु सामान लित कायेत प्रहरी कार्यालयं वंगु विद्यार्थी पुचः हे सामान लित मबिइवं नारा थ्वयेकाः वःगु स्थानीयतय्सं धाःगु दु । थथे नारा थ्वयेकाः वःगु इलय् किपूवासीपिंसं मेस संचालन यानाच्वंगु थासय् हे विद्यार्थीतय्त नके त्वंकेगु व्यवस्था यायेमाः धकाः नारा थ्वयेकूबलय् स्थानीयत झन तम्वःगु खः । किपुली थौंकन्हय् नं प्यथाय् सितिकं नकेगु मेस संचालन यानातःगु दु । थथे थाय्थासय् सितिकं नके–त्वंकेगु व्यवस्था यानातःसां विद्यार्थीतय्त मनकू धकाः किपूवासी व नगरपालिका विरुद्ध हे नारा थ्वयेकूगुलिं स्थानीयत तम्वःगु खँ स्थानीयतय्सं धाःगु दु ।

अथेहे हेमराज थापायात त्वःते माः धकाः नारा थ्वयेका वःसां थापा धाःसा थः हे सुलाच्वंगु खँ नं स्थानीयतय्सं धाःगु दु । थापां न्हियान्हिथं फेसबुकय् स्टाय्टस तयाच्वंगुलिं वयात सुनां ज्वनातःगु मखुसे थः हे सुलाच्वंगु सीदु ।

त्रिविया विद्यार्थीतय्त राहत इनेगु ज्याय् किपू नगरपालिकां ग्वाहालि मयाः धकाः विद्यार्थी नेता धयाजुइम्ह हेमराज थापां सञ्चार माध्यमय् नवाना जुइवं विवाद पिहां वःगु खः । थ्व हे झ्वलय् म्हिगः थापा बालं च्वनाच्वंगु क्वथाय् छापा मारे याःबलय् वयागु क्वथां २२ बोरा जाकि, खुब्वरा दाल, ७० लिटर चिकं बरामद याःगु खः । थापा समाजवादी पार्टीलिसे संलग्न विद्यार्थी नेता खः । समाजवादी पार्टीपाखें म्हिगः हे छगू वक्तव्य जारी यासें राहत इनेत हयातःगु सामग्रीयात प्रहरीं सुचुकातःगु धकाः ज्वंगु खँ धाःगु दु । राहत बियाच्वंपिं विद्यार्थीतय्सं थःपिंके तयेथाय् मदुगुलिं क्वथाय् तयातयागु खँ धाःगु दु ।

मेखे किपू नगरपालिकाया मेयर रमेश महर्जनं धाःसा म्हिगः हे छगू पत्रकार सम्मेलन यासें प्रहरी, स्थानीय व जनप्रतिनिधि जानाः अनुगमन यानागु झ्वलय् वयागु क्वथाय् राहत सामग्री सुचुकातःगु लुइकागु खँ धाःगु खः ।

थ्व हे झ्वलय् समाजवादी पार्टीया पञ्चलाल महर्जन लिसें छथ्वः नेता कार्यकर्तातय्सं थौं किपूया मेयर रमेश महर्जनलिसे आः विकसित जुयाच्वंगु घटनाक्रमयात कयाः खँल्हाबल्हा नं यानादीगु दु ।