ख्वपय् सम्यक तःजिक न्यायेकल

घ्यःचाकु संल्हु कुन्हु ख्वपय् बौद्ध धर्मावलम्बीतय्सं सम्यक दान पार्व न्यायेकूगु दु । लिच्छवी काल निसें न्ह्याना वयाच्वंगु धयातःगु सम्याक दान पर्व बौद्ध धर्मावलम्बीतय् मौलिक पर्व खः । थीथी स्वरुपया बुद्धया मूर्ति व विहारया गुरुजुपिंत थःगु मनोकांक्षा पूवनेमा धकाः सर्वसाधारणं दान बीगु याइ । घ्यःचाकु संल्हु कुन्हु नेवाःतय् घ्यः चाकु लिसें हाम्वःया लड्डु नयेगु प्रचलन नं दु ।

सम्यक दानया निंतिं सुथय् न्हापनं ख्वपया क्वाठण्डोय् च्वंगु प्रशन्नशील महाविहार, साकोथा चतुब्रम्ह महाविहार, गोल्मढी मंगल धर्मदीप विहार, इटाछेँया जयकीर्ति महाविहार (थथुबही) व भार्वाचोया बौद्ध समकृत विहार पाखें न्याम्ह दीपंकर बुद्ध व प्रशन्नशील महाविहारया क्वाचपाः द्यः, सम्यक दान दाताया कूल द्यः, थासंद्यः (सुवर्ण चैत्य), प्यम्ह लुँद्यः (सुवर्ण दीपंकर) व प्रशन्नशील महाविहारया स्थविर आजु, गुणकीर्ति महाविहार (थिमि)या गुरुजुपिं ख्वपया जयकीर्ति महाविहार थथुबहिली च्वंगु भुख्यलय् हःगु खः ।

सम्यक दानय् जमीनय् बुया वइगु फुक्क कथंया अन्न, गेडागुडी लिसें सिसाबुसा, मरिचरि दान बीगु याइ । अथेहे वा, जाकि, साखः ल्वाकछ्यानाः दयेकातःगु विशेष कथंया लड्डु, पुरी व दक्षिण नं दान याइ । सम्यक भोजनय् सहभागी भिक्षु, वज्राचार्य व शाक्यतय्त नं थुपिं सामग्री दान याइ ।

थ्व पर्वय् दान याइम्ह दातां बौद्ध विहारय् दीक्षित जुयाः गृहस्थ जुयाच्वंपिं शाक्य, वज्राचार्य व बन्देतय्त भोजन व अन्न दान यानाः पर्व न्यायेकी । लिच्छवी जुजु वृषदेवया पालय् थ्व पर्व सुरु जूगु वि श्वास यानातःगु दु । स्वनिगःया साँस्कृतिक सम्यक दान पर्व नियमित व ऐच्छिक यानाः निगू कथं न्ह्याना वयाच्वंगु दु ।

झिंनिदँ छक्वः स्वयम्भुया भुइख्यलय् व न्यादँय् छक्वः यलया नागबहालय् नं सम्यक दान पर्व जुइ । ख्वपय् धाःसा दँय्दसं घ्यःचाकु संल्हुकुन्हु सम्यक जुइ । ख्वपया सम्यक भोजन दान पर्व नेपाल संवत् ७८७ स ख्वपया चतुब्रम्ह महाविहारया वज्राचार्य जयरत्नं सुरु याःगु धयातःगु दु ।

सम्यक दान याःगु थाय् भक्तपुर इटाछेँय् च्वंगु थथुबही (जयकीर्ति महाविहार) उगु इलय् जीर्ण जुयाच्वंगुलिं जयरत्नं जीर्णोद्वार याःगु इतिहास नं दु । जयरत्नं सम्यक दान पर्व नियमित रुपं दँय्दसं न्यायेकेते ३६० रोपनी जग्गा आयस्ताया व्यवस्था नं यानाथकूगु खः । जयरत्न धुंकाः वया कायपिं जयमुनि, जयधर्म, जयचन्द्र व छय् पूर्णराजं भव्य रुपं सम्यक दान पर्व यानाः सुवर्ण दीपंकर स्थापना याःगु खः ।

ने.सं. १०४४ य. ख्वप क्वाठण्डौ विश्वकर्माछेँ त्वाःया शाक्यभिक्षु जुजुरत्नं ऐच्छिक सम्यक दान ग्वसाः ग्वःबलय् ख्वपया प्रमुख न्याम्ह दीपंकर, सुवर्ण द्यःलिसें लोकेश्वर, स्वयम्भू तथागत, साँखुया वज्रयोगिनी, नमोबुद्ध, जनबहाद्यः, भ्वँत, पनौति, श्रीखण्डपुर, नाला, सांगा, थिमिइ च्वंपिं दीपंकर तथागतपिं नं उपस्थित जूगु ऐतिहासिक तथ्य दुगु खँ भक्तपुर सम्यक महादान व्यवस्थापन समितिया देवेचन्द्र वज्राचार्यं कनादीगु दु ।

 

सम्बन्धित बुखँ

LEAVE YOUR COMMENTS