नेपाल पक्षं स्पष्टीकरण मबीगु !

येँ- नेकपा एमालेया अध्यक्ष केपी ओली पक्षयापाखें नेता माधव कुमार नेपाल लिसें प्यम्हेसित स्पष्टीकरण न्यनेगु पौ छ्वयेधुंकाः आः नेपाल पक्षं गज्याःगु लिसः वइ धयागु विषयय् चर्चा सुरु जूगु दु । ओली पक्षं नेपाललिसें नेतात भीम रावल, सुरेन्द्र पाण्डे व घनश्याम भुसालयात स्पष्टीकरण पौ छ्वःगु खः । रावल एमालेया उपाध्यक्ष, भुसाल उपमहासचिव व सुरेन्द्र पाण्डे सांसद खः ।

ओली पक्षं न्यंगु स्पष्टीकरणय् नेपाल पक्षं गज्याःगु लिसः वइगु धयागु उत्सुकता जुयाच्वंगु इलय् स्पष्टीकरणय् लाःम्ह छम्ह नेतां धाःसा थःपिंसं लिसः हे मबीगु संकेत बियादीगु दु । स्पष्टीकरणय् लाःम्ह नेता रावलं थःपिंत न्यंगु स्पष्टीकरण हे अवैध जूगु व थ्व थःपिंत अस्वीकार्य दुगु खँ धयादीगु दु ।

वय्कलं धयादीगु दु, ‘स्पष्टीकरण न्यनेगु गुगु ज्या जुल, व हे पार्टीया विधान अःखः, राजनीतिक दृष्टिकोणं अनैतिक व लोकतान्त्रिक दृष्टिकोणं अलोकतान्त्रिक खः । वय्कःपिंसं यानादीगु केन्द्रीय समितिया बैठक हे अवैध खः, थज्याःगु बैठकं याःगु निर्णयया छुं औपचारिक लिसः बियाच्वनेमाःगु आवश्यक मदु ।’

प्रधानमन्त्री व पार्टी अध्यक्ष ओलीं हे बरु पार्टीया विधान अःख यक्व ज्या याःगु द्वपं बियादिसें नेता रावलं अःखबतं ओलीं जक स्पष्टीकरण बीमाःगु खँ धयादीगु दु ।

शनिवाः च्वंगु ओली पक्षया केन्द्रीय समितिया बैठकं प्यम्ह नेतातय्के स्पष्टीकरण कायेगु निर्णय याःगु खः । थ्व बैठकय् नेपाल–खनाल पक्षया सुं हे नेतातय्सं धाःसा ब्वति मकाःगु खः ।

बैठकया निर्णय कथं एमाले केन्द्रीय कार्यालयया सचिव ईश्वरी रिजालं सोमवाः प्यम्ह नेतापिंत स्पष्टीकरण बीत पौ लःल्हाःगु खः । महासचिव ईश्वर पोखरेलं हस्ताक्षर यानातःगु पतिइ स्वन्हुया दुने चित्त बुझे जुइकथं लिसः बीत धयातःगु दु । उकथं हे पतिइ स्पष्टीकरण चित्त बुझे मजुल धाःसा पार्टीया विधान कथं कारबाही जुइगु खँ नं न्ह्यथनातःगु दु ।

नेपाल खनाल पक्षं वंगु बुधवाः व बिहीवाःस्वनिगलय् याःगु राष्ट्रिय कार्यकर्ता भेला याःगुयात कयाः थ्व स्पष्टीकरण न्यंगु खः । उगु भेलां ओली पक्षं थःगु गुटया जक सीमित मनूत बाहेक केन्द्रीय समतिया दुजःतय्त जानकारी हे मबिसे विधान संशोधन याःगु, केन्द्रीय समितिया पदाधिकारी हिलाबुला याःगु व न्हूपिं सदस्य मनोनयात याःगुयात अस्वीकार यायेगु निर्णय याःगु खः ।

ओली पक्षया शनिवाः च्वंगु केन्द्रीय समितिया बैठकं पार्टी दुने समानान्तर समिति दयेकूगु, पार्टी पाखें निर्णय हे मयासे समानान्तर ज्याझ्वः याःगु धासें छाय् थथे याःगु धकाः स्पष्टीकरण न्यनेगु निर्णय याःगु खः ।

नेता रावलं ओली पक्षया पाखें पार्टीइा विधान व संगठनात्मक एकताय् हे खतरा वइ कथं ज्या यानाच्वंगुलिं थःपिंसं राष्ट्रिय भेला यायेमाःगु खँ धयादीगु दु ।

सम्बन्धित बुखँ

LEAVE YOUR COMMENTS