
ये- येँ मनपा वडा नं. १ या नक्सालस्थित शंकरकीर्ति महाविहारं थनिं ४० दँ न्ह्यः तंम्ह वज्रपाणी लोकेश्वर द्यः हानं लुइकाः पलिस्था याःगु दु । तनाच्वंम्ह उम्ह द्यः येँया छावनीस्थित संग्रहालयय् तयातःगु खःसा सांस्कृतिक अभियन्तातय्सं उम्ह द्यःयात म्हिगः संग्रहालयं हयाः हानं पुलांगु हे थासय् पलिस्था याःगु खः । द्यःयात हानं पुलांगु हे बहालय् पलिस्था यायेगु लागिं सांस्कृतिक अभियन्ता यादवलाल कायस्थ लगायतया पुचलं पहल याःगु खः ।
म्हिगः छावनीया म्युजियमंनिसें द्यःयात बग्गीइ तयाः यंकूगु खःसा उकिया लिउ लिउ गुर्जुया पल्टन नं तया यंकूगु खः । लिसें उगु इलय् नक्सालया सम्बन्धित विहार लगायत आपालं भक्तजन व संस्कृतिह्यमितय्गु नं उपस्थिति दुगु खः ।
नक्सालय् च्वंगु शंकरकीर्ति महाविहार उगु लागाया आकर्षक व पुलांगु विहार खःसा थ्वयात स्थानीय मनूतय्सं भगवान बहाः धायेगु याः । थ्व बहालयय् च्वंगु जीर्ण अवस्थाय् लानाच्वंगु क्वाःपाःद्यः छेँ छुं ई न्ह्यः तिनि पुरातत्व विभागया खर्चं पुनर्निर्माण याःगु खः । तकूगु थाय् निर्माण यानातःगु बहाः खःसां थ्व बहाः येँया परम्परागत झिंच्यागू बहाः वा बही संघ दुने धाःसा मलाः ।
थ्व येँ दुनेया हे छगू बहाःया कचा बहाः कथं सञ्चालन जुयाच्वंगु दुसा थन येँया झ्वाःबहाः लगायत बहालं वइपिं गुर्जुपिंसं पुजाआजा यायेगु यानाच्वंगु दु । थ्व बहाःयात स्थानीय मनूतय्सं भ्वय् आदि नयेगु ज्याय् छ्यलाच्वंगु दु । थन लिच्छविकालीन चैत्य लगायत आपालं ल्वहंया मूर्तित नं तयातःगु दु ।
म्युजियमय् तयातःम्ह द्यः लुइकाः हानं पलिस्था यायेधुंकाः आः थुकियात सामाजिक रुपं हे सुरक्षा याना तयेगु खँ स्थानीय मनूतय्सं धाःगु दु । द्यः लिहां वःगु खँय् स्थानीय मनूतय्सं लसता नं प्वंकूगु दु ।
LEAVE YOUR COMMENTS