मेलम्ची सेनायात बीगु तयारी

कर्मचारी धाःसा न्हूम्ह ठेकेदार मालेगु पक्षय्

येँ – इटालियन ठेकेदार कम्पनी सीएमसीं ज्या याये फइमखु धकाः ठेक्का त्वःताः लिहां वनेवं आः मेलम्ची आयोजना गुकथं न्ह्याकेगु धइगु बारे सरकारं सहलह शुरु याःगु दु । सीएमसी लिहां मवइगु निश्चित जुइवं सरकारं ठेक्का भंग यायेगु प्रक्रिया न्ह्याकेधुंकूगु दु । थ्वहे झ्वलय् सरकारं मेलम्ची आयोजनाया ल्यं दनिगु ज्या क्वचायेकेगु निंतिं आः नेपाली सेनायात ज्या याकेत्यंगु खँ नं सीदुगु दु ।

उकिया बारे नं सहलह सरकारं यानाच्वंगु खँ सीदुगु दु । न्हूम्ह ठेकदार ल्ययाः ज्या याकेबलय् म्होतिं नं मेगु निदँया ई काइगु व थ्व ज्या जोखिमपूर्ण समेत जुइफइगु जूगुलिं सरकारं सेनायात ज्या याकेगु विकल्प बारे बिचाः यानाच्वंगु खँ धाःगु दु । मेलम्चींनिसें सुन्दरीजल तक वइगु सुरुङया संवेदनशीलतायात ध्यानय् तयाः राजनीतिक तहलय् सेनायात बीगु खःला धइगु बारे सहलह जुयाच्वंगु खँ खानेपानी मन्त्रालयं धाःगु दु ।

मेलम्चीइ सुरुङया ज्या याये अःपु मजूगुलिं सेनायात बिल धाःसा थुकिं बांलाक गति काइगु विश्वास सरकार व राजनीतिक तहया नेतातय्सं यानाच्वंगु दु । मन्त्रालयया थुगु प्रस्तावय् आयोजना सकारात्मक जूसां नं एशियाली विकास बैंक (एडीबी) या प्रतिक्रिया छु जुइ धइगु बारे धाःसा न्ह्यसः ब्वलनाच्वंगु दु ।

सूत्रया कथं दातृ निकाय सेनायात ज्या याकेत तयार मदु । एडीबी सार्वजनिक खरिद ऐन कथं हे न्हूम्ह ठेकेदार ल्ययाः ज्या न्ह्याकेगु पक्षय् दु । यदि सरकारं सेनायात ज्या याकेगु खँ हल धाःसा एडीबी आयोजनां लिचिलेफुगु ग्याःचिकु सरकारयात जुयाच्वंगु दु । अथे जुल धाःसा सरकारं ल्यं दनिगु ज्याया निंतिं थःपिंसं हे खर्च यायेमाःगु अवस्था वइ ।

अथे जुल धाःसा मेलम्ची आयोजन अझ नं लिबाइगु सम्भावना दु । मेखे मेलम्चीया सुरुङ मार्गं मेगु निगू खुसिया लः नं स्वनिगलय् हयेमाःगुलिं सरकार तत्काल एडीबीया निर्णय अःखः वने मफइगु खँ नं सूत्रं धाःगु दु । खानेपानी मन्त्रालयया पदाधिकारीत धाःसा फुसा सेनाया ज्या मबिसे न्हूम्ह हे ठेकेदारयात जिम्मा बीगु पक्षय् दुगु खँ सूत्रं धाःगु दु ।

न्हूम्ह ठेकेदार ल्ययेसातकि वपाखें कमिशन नये दइगु जूगुलिं कर्मचारीत परियोजना लिबाःसां ठेकेदार न्हूम्ह ल्ययेगुपाखे दुगु सूत्रया दावी दु । थ्व परियोजना त्वःताः इटालीया कम्पनी लिहां वंगु नं कर्मचारीतय्सं ज्या याःगु वापत भुक्तानी मबिउगुलिं खः धाःगु दु । यदि सम्झौता त्वाःदल धाःसा इटालीया कम्पनी अन्तर्राष्ट्रिय अदालत वने फुगु खँ नं धाःगु दु ।

 

सम्बन्धित बुखँ

LEAVE YOUR COMMENTS