नेवाःतय्गु दिप बन्द याकेगु सर्वोच्च अदालतया फैसला सांस्कृतिक अधिकारय् हस्तक्षेप
येँ (नेपालभाषा टाइम्स)÷चाबहीया गंगाहितिइ च्वंगु परम्परागत दिपय् सी उइ दइ मखु धकाः सर्वोच्च अदालतं याःगु फैसलायात कयाः स्थानीय नेवाः समुदाय व खलः पुचःतय्सं चिउताः प्वंकूगु दु ।
उगु लागाय् लिपा छेँ न्यानाः च्वं वःपिं आप्रवासीतय्सं पुलांगु दिपय् सी उइके बी मखु धकाः न्हापांनिसें प्रतिकार यानाच्वंगु खःसा लिपांगु इलय् उमिसं थुकिया विरुद्ध सर्वोच्चय् रिट दायर याःगु खः । उकियात हे फैसला यासें सर्वोच्च अदालतं उगु दिपय् सी उगु ज्यां स्थानीय मनूतय् स्वास्थ्यय् प्रतिकुल लिच्वः लाःगु जुयाः अन थ्व ज्या बन्द याकेगु धकाः येँ महानगरपालिकाया नामय् आदेश जारी याःगु खः ।
आदेशय् उगु दिपय् सी उइमाःपिं मनूतय्त सःताः उमित उकिया पलेसा मेगु विकल्प बीगु लागिं संवाद न्ह्याकि धकाः नं धयातःगु दु ।
अथे हे सर्वोच्चं सी उइगु कुँपाखें पर्यावरणीय प्रदुषण जक मखु सिथं हइबलय् मनूत ख्वइगु व शंख पुइगु सलं ध्वनी प्रदुषण समेत जुइगु जुयाः उकियात समेत प्रतिबन्ध तयेमाःगु हास्यास्पद खँ नं धयातःगु दु । दिपया नापसं च्वंगु निजी क्षेत्रया ओम अस्पतालया विरामीत नं मनू सी उइगु कारणं प्रभावित जूगु कारणं थुकियात पनेगु जिकिर सर्वोच्चया फैसलाय् यानातःगु दु ।
अथे हे मनू उइगु ज्यापाखें स्थानीय जःखः च्वनीपिं स्थानीयवासीत प्रभावित जुइगु घटना येँ मनपा दुनेया मेमेगु नं गनं थासय् जुयाच्वंगु दु ला धकाः अध्ययन या धकाः नं मनपायात आदेश बियातःगु दु । सर्वोच्चया फैसलाय् धयातःगु थ्व बुँदापाखें येँया मेमेगु परम्परागत दिपत नं खतराय् लाःगु खँ धाःगु दु । सर्वोच्चया फैसलाय् धयातःगु थ्व बुँदा मुद्दा तःपिंसं माग याःगु स्वयां नं अप्वः खँ उल्लेख याःगु अर्थय् थुइकूगु दु ।
थुकिं यानाः आः येँया मेमेगु नं दिप सञ्चालन याइपिं गुथि व स्थानीय समुदाय समेत सचेत जुइमाःगु महसुस याना हःगु दु ।
नेवाः देय् दबूपाखें सरोकार
सर्वोच्च अदालतं याःगु थ्व फैसलायात कयाः नेवाः देय् दबूपाखें अन सी उइगु ज्या याये माःपिं स्थानीय व्यक्ति व गुथियारतलिसे सहलह ब्याकूगु दु । सहलह ज्याझ्वलय् सर्वोच्चया थ्व फैसलापाखें येँ देय्या मेमेगु दिपत नं प्रभावित जूगु कारणं आः थःपिं गय् यानाः न्ह्याः वनेगु धकाः बिचाः ब्याकेगु ज्या जूगु खः ।
आः देय् दबूपाखें शुक्रवाः उगु दिपय् हे वनाः सम्बन्धित गुथियारतलिसे सहलह ब्याकेगु निर्णय जूगु दु । लिसें सर्वोच्चया थ्व फैसलां मेमेगु दिपत नं प्रभावित जुइ फुगु जुयाः येँय् थथे घाट सञ्चालन यानाच्वंपिं मेमेगु गुथि व सरोकारवाला पुचःतलिसे सहलह ब्याकेगु धकाः नं निर्णय याःगु दु ।
सहलह बैठकय् थीथी कानून व्यवसायीतय्सं नं ब्वति काःगु खःसा सर्वोच्चया फैसलायात गय् यानाः प्रतिकार यानाः न्ह्याः वनेगु धकाः नं सहलह जूगु खः । सर्वोच्चया थ्व फैसला स्थानीय आदिवासीया थःगु परम्परा चले यायेगु अधिकारया खिलाफ जूगु कारणं अन्तर्राष्ट्रिय कानून व राष्ट्र संघीय बडापत्रया आधार कयाः थुकिया प्रतिकार याना वनेगु खँय् नं सहलह जूगु खः । सर्वोच्चया थ्व फैसलां स्थानीय जनताया संस्कृति हनेगु मानव अधिकार हनन जूगु खँ धाःगु दु ।
LEAVE YOUR COMMENTS