आः फुकसित हे कःघानाः यंके

थुगुसी जूगु हलिं नेवाः दबूया स्वक्वःगु तःमुँज्यायात गुकथं कयादिया ?

– थ्व ला ऐतिहासिक हे तःमुँज्या खः । झीसं नेपाल् हे तःमुँज्या याये धकाः स्वक्वः तक कुतः यानां नं थीथी कारणं याये मफयाच्वंगु खः ।नेपालय् यायेगु धकाः घोषणा हे यानां नं मजुल । जनवरी, मार्च व अक्टोबरय् यायेगु धकाः कुतः यानागु खः, मजुल । तर थुगुसी जुल । थ्व सफल खः । स्वनिगः धइगु झीगु मुख्य हा खः । थुकी विश्वया १८ गू देय्या नेवाः संस्था वःगु दु । सहभागी अप्वः दइगु आशा जूगु खः तर थ्व भचा कम जुल ।

कार्यक्रम नं ल्वाःगु जुयाः कम जूगु थें च्वं । झीसं छु याये धया व जुल । यक्व अन्तक्र्रियात जुल । सुझावत यक्व जुल । थ्व तःधंगु उपलब्धी खः । विश्व नेवाः दिवस कुन्हु छगू ¥याली हे पिहां वल, थ्व नं तःधंगु हे खँ खः । नेवाः जुयाया गर्व तायेकेगु ज्या जुल ।थुकियात यक्व हे सकारात्मक रुपं काःगु दु । येँ, यल व किपूया मेयरजुपिं हे सहभागी जुयाः वःगु धइगु झीगु तःधंगु उपलब्धी खः ।

थ्व नेवाः दिवसं हलिंन्यंकं छगू न्हूगु जागरण हःगु दु । नेवाःत छप्पँ जुइमाः धइगु भावना थुकिं ब्वलंगु दु । नेवाः दिवस कुन्हु झी छु छु देशय् च्वंच्वनागु खः वहे देशया भासं नं नेवाःया बारे पोष्ट यानाः क्यनेगु धइगु नं झीगु उद्देश्य खः, तर व भचा मजुल । मखुसा विश्वं हे थ्व दिवस हंगु धइगु चीधंगु खँ मखु ।

थुगुसीया तःमुँज्याय् भचा फाकुगु नं अनुभव जुल । आः तःमुँज्या क्वचायेधुंकाः थ्व फाकुगु ज्या खँ छु जुइ ? बढे जुया वनी कि ?

– मखु, व ला छुं नं हालतय् बढे जुइ मखु । न्ह्याथे यानाः नं घटे याना यंकेगु जुइ । आः पुलांगु खँ त्वःताः हे न्ह्याः वनेमाः ।

आः थ्व घटे यायेत छिं छु यानादी ?

– व ला जिं थनं वनेवं हे कुतः याये । आः गन तक थ्व अवस्था वःगुया खँ दु, मनूतय्सं पदया लागिं नं अथे जूगु धकाः नं धाल । तर थ्व संस्था गुलि गुलि बल्लाना वनी उलि उलि हे थुकी पदय् वयेत प्रतिस्पर्धा नं अप्वया वनी । तर उकियात व्यवस्थित यायेत झीके विधान दु । उकिया पालना जूसा बांलाः । सहमति यानाः पद बीगु धइगु खँय् जिअसहमत जुयागु हे खः ।

थ्व ला छगू वल्र्ड संस्था खः । थुकी नेतृत्व छाने यायेगु अधिकार सकसिकें दये हे माः । अथे जुल धाःसा योग्यम्ह नेतृत्व ल्यये फइ ।तर थ्व खँय् गुगु फाकुगु खँ जूगु खः, उकियात जिं मदयेकेगु कुतः याये । नेवाः मुद्दायात न्ह्यःने यंकेगु खःसा झी मिले जुयाः हे न्ह्याः वनेमाः ।

आः निर्वाचित जुयादीधुंकाः दकलय् न्हापां छु यानादी ?

– दकलय् न्हापां ला जिं झी मतमुताव जुयाच्वंपिं पासापिंत बोर्डय् हयेगु कुतः याये । छाय्धाःसां आः ला युनाइटेड हे जुइमाः । सकसितं कःघानाःहे यंके ।

उकुन्हु बन्द सत्रय् पदाधिकारी सकलें मगाः, आः मगाःपिं गय् यानाः कयादी ?

– स्वयादिसँ, झीके प्रजातान्त्रिक अभ्यास मदुनि धइगु थ्वहे खः । चुनाव जूगु जूसा सकलें निर्वाचित जुयाः वइगु खः, आः ल्ययाः कायेमाःगु अवस्था जुल । झी नं चुनावं वयेगु सिबें ल्ययाः कया बिउसा जिउ धइगु मानसिकता दु । बाल्टिेमोरय् तःमुँज्या जूबलय् नं ७ म्ह पदाधिकारी वःगु खः । लिपा मेपिं ल्ययाः हे कयागु खः । पदाधिकारी ल्यये सिमधःतले औपचारिक बैठक मयाना ।

सहलह जक जुइगु खः । आः नं अथे हे जुइ । आःअमेरिकाय् जक १२ गू नेवाः संस्था दु । तर उमित जक मतसे विभिन्न २५ देशयापिं नेवाःत दुथ्याकेगु बिचाः दु ।

छिगु कार्यकाल ला दत्या जक दु, थ्व दत्याया दुने आः छु छु यायेगु ग्वसाः दु ?

दत्यां ला यक्व ज्या याये फइ थें मच्वं । भाषा स्यनेगु एप्स, नेवाः बारे सम्पूर्ण जानकारी एप्स दयेकेगु ज्या यानाच्वनागु दु । संस्था बल्लाकेगु खःसा आर्थिक अवस्था बल्लाकेमाः । उकिया लागिं नेटवर्किङ यायेमाःगु आवश्यकता दु । फाउण्डेशन बल्लाकेगु ज्या यायेमाः धकाः थगुने घोषणा जूगु वल्र्ड नेवाः फण्ड अवश्य दयेकेगु जुइ । दत्याया दुने जिं फण्डय् २० लाख ति खाकेत कुतः यायेगु जुइ । अथे हे थन ब्वलनाच्वंगु नेवाः मुद्दायात अन्तर्राष्ट्रिकरण यायेगु ज्या जुइ । आः न्ह्यागुसां चीहाकःगु इलय् अप्वः ज्या याये माःगु दु ।

आः दत्या लिपा छिं पद त्वःतादीबलय् नायः छम्ह जक हिली लाकि कार्यसमिति नं हिली?

– कार्यसमिति हे हिलेत ला थाकुइ जुइ । मनूत हे दइ मखु । उकिं अध्यक्ष जक हिलीगु जुइ ।

छिगु थ्व दत्याया कार्यकालय् लिपा नायः जुयादीम्ह भाजु दया शाक्यया भूमिका छु जुइ ?

– व जिं वय्कःलिसे सल्लाह याये मानि । जिं वय्कःयात वरिष्ठ न्वकु जुयादीत हे इनाप याये ।माने जुयादी लाकि जुयादी मखु मसिउ।माने जुयामदीसा सल्लाहकार जूसां जुयादी ला ? वय्कःया ग्वाहालि ला मा हे माः । वय्कः ला संस्थापक दुजः नं खः । वय्कःया ग्वाहालि कयाः हे न्ह्याः वनेगु खः ।

अले दत्या लिपा दया शाक्यजुया कार्यकालय् छिगु भूमिका छु जुइ ?

– नायः त्वःतेधुंकाः ला जि स्वतः हे संस्थाया सल्लाहकार जुइ । सल्लाहकारया रुपय् जिं सक्रिय रुपं हे ज्या याये । नेपालभाषा ख्यलय् २४ दँ ला ज्या याये हे धुन । उकिं हानं यानावं हे वने । दयाजुयातपूवंक हे ग्वाहालि याये । आः दयेका तयागु कनेक्शनयात वय्कःया पालय् अझ मजबुत याना यंके ।

दछि न्ह्यः छिकपिं येँय् झाःबलय् यक्व ज्या यायेगु बचं बिया थकादीगु खः, उकियात पूवंकेगुपाखे छु पहल जूगु दु ?

– थगुने जिपिं वयाबलय् थन ५६ गू मिटिङ याना वनागु खः । उकी अप्वःसिनं आर्थिक हे आशा यानाच्वंगु दु । तर थ्व झीगु संस्था शरीर तःधं, तुति धाःसा चीधं । उकियात बल्लाकेगु ज्या जुइमाःगु दु । झीत यक्वस्यां आर्थिक ग्वाहालिया लागिं हे इनाप यात । झीसं फ हे मफइगु प्रोजेक्टया लागिं समेत इनाप वःगु खः । आः ला झीसं खल्तीं हे ध्यबा तयाः ज्या यायेमाःगु अवस्था दु । उकिया लागिं हे नेटवर्किङ माःगु खः ।

डब्लुएनओ अमेरिकाय् दर्ता जूगु संस्था जूगु कारणं अमेरिकी सरकारपाखें ध्यबा माग याये फइ लाकि फइ मखु ?

– व यायेत भचा थाकु । जिं थुकिया लागिं नं अनया छुं नेतातलिसे खँ ल्हानागु खः । डब्लुएनओ थौंकन्हय् ‘ननप्रोफिट’ संस्था खःसां कर धाःसा पुलेमाः । कर पुलेम्वाःगु संस्थाया दर्जा काये फत धाःसा यक्व अनुदान कायेगु अवस्था वइ । कर पुलेम्वाःगु संस्थाया दर्जा दत धाःसा झीसं नं कर पुले माली मखु, अले झीत चन्दा तःगु ध्यबाया लागिं चन्दादातां नं कर पुले माली मखु । आः झी थ्व दर्जा कायेगु प्रोसेसय् दु । थ्व स्टेटस दत कि अप्वः ध्यबा मुनी ।

डब्लुएनओया नेटवर्किङ बल्लाका वनेगु लागिं छिके छु योजना दु ?

– थुकिया लागिं झीसं थाय्थासय् नियमित ज्याझ्वःत यायेमाः । थुकिं यानाः डब्लुएनओ धाःगु मसिउपिंसं नं सिया वइ । विश्वया फुक्क नेवाःत छक्वलं मुने फइ मखु । उकिं क्षेत्र छुटे यानाः सम्मेलनत याना वने माःगु आवश्यकता दु । गथे कि छुं दँ न्ह्यः तिनि क्यानाडय् नर्थ अमेरिकन रिजनल नेवाः कन्फरेन्स याना । उकी मेक्सिको, क्यानाडा, अमेरिकाया नेवाःतय्सं ब्वति कायेगु खँ दुगु खः, तर मेक्सिकोयापिं थ्यने मफुत ।सम्मेलन क्यानेडियन नेवाः गुथिं होस्ट याःगु खः ।

थुकिं यानाः उखे डब्लुएनओ यक्व बय्बय् जुल । थ्व सम्मेलन लिपा क्यानेडियन नेवाः गुथियात ज्या यायेगु लागिं अनया टोरोन्टो युनिभर्सिटीं ग्वाहालि बीगु शुरु जुल ।
आः उकथं हे युरोपया क्षेत्रीय सम्मेलन यायेगु प्रस्ताव यानागु दु । अथे हे थन दक्षिण एशियाली नेवाः सम्मेलन यायेगु नं ग्वसाः दु । नर्थ अमेरिकन क्षेत्रीय सम्मेलनहानं याकनं जुइत्यंगु दु । उकथं हे मिडल इस्ट वप्यासिफिक लागाय् नं अलग अलग सम्मेलन याना वने फत धाःसा थुकिया नेटवर्किङ विस्तार जुया वनी ।

डब्लुएनओं बांलाक ज्या याये मफु धाःसां थुकिया नेटवर्किङ विस्तार जुया वनाच्वंगु दु । लण्डनय् न्हापांगु मुँज्या जूबलय् ६ गू देशं ब्वति काःगु खःसा बाल्टिमोरय् १२ गू देशंब्वति किाल ।आः थुगुसी १७ गू देशयापिं थ्यन । थ्व ल्याः बढे जुयाच्वंगु दु । संस्थाय् विश्वया नेवाःतय्सं रुची क्यनाच्वंगु दु धइगु खँया चिं खः थ्व । थुकिं झीत सकारात्मक संकेत बियाच्वंगु जिं खंका ।
न्ह्यब्वःम्ह ः सुरेश

सम्बन्धित बुखँ

LEAVE YOUR COMMENTS