कलाकार पल्पसा डंगोल म्हं मफु

येँ- लोकंह्वाःम्ह कलाकार पल्पसा डंगोलं म्हं मफयाः अस्पताल भर्ना जुयादीगु दु । कलाकार पल्पसा जँलास्येँया समस्या जुयाः त्रिवि शिक्षण अस्पताल भर्ना जुयादीगु दु ।
खय् भाय्या संकिपा ख्यलय् ‘चम्सुरी’या नामं अतिकं लोकंह्वाःम्ह कलाकार पल्पसा नेवाः संकिपा ख्यःया नं छम्ह धिसिलाःम्ह कलाकार खःसा वय्कलं हुलाप्याखं विधापाखें थ्व ख्यलय् पलाः न्ह्याकादीगु खः ।

पारिवारिक सुत्रया कथं पल्पसायात न्हापांनिसें जँलास्येँया समस्या जुयाच्वंगुलिं नयेत्वनेगुलिइ नं उतिकं ध्यान बिया वयाच्वंम्ह खः । आकाझाकां लिपांगु इलय् तच्वकं समस्या जुइवं वय्कःयात अस्पताल हे भर्ना यायेमाःगु खः ।

लछि न्ह्यः नं वय्कः म्हं मफयेवं शिक्षण अस्पताल भर्ना जुयादीगु खःसा छुं दिं न्ह्यः जक डिस्चार्ज जुयादीगु खः । छेँय् लिहां वयेधुंकाः हाकनं स्वास्थ्यय् समस्या खने दयेवं शिक्षण अस्पतालया बेड नं. ३५० य् भर्ना जुयाः स्वास्थ्य लाभ याना च्वनादीम्ह वय्कःया डायलोसिस यायेगु ज्या जुयाच्वंगु दु ।
चिकित्सकतय्सं वय्कःयात फक्व याकनं जँलास्येँया प्रत्यारोपण यायेत सुझाव बिउगु दु ।